Жанубий Кореяда Интерпол линияси бўйича қидирувда бўлган 19 нафар Ўзбекистон фуқароси яшириниб юрибди
Хорижда жиноят содир этиб, Интерпол орқали қидирувда бўлган 100 дан ортиқ чет эл фуқароси Жанубий Кореяда яшириниб юрибди. Миллий полиция агентлиги маълумотларига кўра, улардан 19 нафари Ўзбекистон фуқароларидир. Жиноятларнинг аксарияти фирибгарлик билан боғлиқ.
Жанубий Кореяда Интерпол линияси бўйича Ўзбекистоннинг 19 нафар фуқароси қидирувда
12 август ҳолатига кўра, Жанубий Кореяда хорижда содир этган жиноятлари учун қидирилаётган 110 нафар чет эл фуқароси яшириниб юрган. Улардан 19 нафари — Ўзбекистон фуқароларидир. Бу ҳақда Миллий полиция агентлиги маълумотларига таяниб Yonhap агентлиги хабар бермоқда.
Интерпол линияси бўйича қидирилаётганлар орасида энг катта улуш Хитой фуқароларига тўғри келади — 40 киши ёки 36%. Кейинги ўринларни Ўзбекистон (19) ва Мўғулистон (17) фуқаролари эгаллаган.
Чет элликлар кўпинча фирибгарлик учун қидирилган — 47 та ҳолат. Яна 29 та ҳолат бошқа жиноятлар, жумладан, одам ўғирлаш, ноқонуний озодликдан маҳрум қилиш ва жинсий эксплуатация мақсадида одам савдоси билан боғлиқ. Қолган ҳолатлар гиёҳвандлик воситалари билан боғлиқ жиноятлар (7), ўғрилик (5), йўл ҳаракати қоидаларини бузиш (5), ҳужум қилиш (5) билан боғлиқдир.
Халқаро жиноятчиликка қарши курашиш мақсадида Жанубий Корея Миллий полиция агентлиги жорий йилда хорижлик жиноятчиларни қидириш билан шуғулланувчи ходимлар сонини 22 нафардан 64 нафарга кўпайтирди. Натижада қайтарилган қидирувдаги чет элликлар сони деярли икки бараварга ошди — 2025 йилдаги 13 кишидан 2026 йилнинг январь-август ойларида 24 кишигача, деб ёзади агентлик.