Истанбулда икки нафар ўзбекистонлик афғонистонликка суиқасд қилишда гумонланиб ҳибсга олинди

Истанбулда икки ўзбекистонлик афғонистонликни қасддан ўлдиришга уринишда гумонланиб ҳибсга олинди

Истанбулда Ўзбекистоннинг икки фуқароси 21 ёшли афғонистонликни қасддан ўлдиришга уринишда гумонланиб ҳибсга олинди. Жабрланувчининг таъкидлашича, эркаклар уни калтаклаб, учинчи қават ойнасидан улоқтириб юборган. Гумонланувчилар эса ўз навбатида айбловларни рад этиб, йигитнинг ўзи сакраб тушганини даъво қилмоқда.

Туркиянинг Sabah газетаси ёзишича, ҳодиса 26 сентябрь куни Тузла туманида содир бўлган. Учинчи қаватдан йиқилганидан сўнг йигит шифохонага ётқизилган. Сўроқ пайтида у полициячиларга бир қават юқорида яшайдиган қўшнилари унга ҳужум қилганини маълум қилган.

Истанбулнинг Осиё қисми прокуратураси томонидан бошланган тергов давомида ҳуқуқ-тартибот органлари ходимлари икки ўзбекистонликни қўлга олди.

Биринчи гумонланувчи терговчиларга аввал жабрланувчи билан бирга ишлаганини айтган. Унинг сўзларига кўра, ҳодиса содир бўлган куни у тўсатдан ўз хонадонида йигитни кўриб қолган. Улар ўртасида мушталашув келиб чиққан, шундан сўнг ўзбекистонлик ташқарига чиқиб, ёрдамга чақира бошлаган.

Эркакнинг таъкидлашича, шундан сўнг афғонистонлик бошқа хонага ўтиб, ойнадан сакраб тушган. Иккинчи қўлга олинган шахс ҳам айбловларни рад этди. Унинг талқинига кўра, у мушталашув шовқинини эшитиб хонадонга кўтарилган, можаро иштирокчиларини ажратишга ҳаракат қилган ва бир неча дақиқадан сўнг йигитнинг йиқилганидан хабар топган.

Сўроқлардан сўнг прокуратура ҳар иккала ўзбекистонликни қасддан одам ўлдиришга уринишда гумонлаб ҳибсга олишни сўраб, материалларни судга топширди. Суд илтимосномани қаноатлантирди. Тергов давом этмоқда.