Исроилликларнинг ярмидан кўпи исроиллик эканини айтишдан қўрқади — сўровнома
Исроилликларнинг ярмидан кўпи ўз миллатини ошкор қилишдан чўчимоқда – сўровнома натижалари
Сентер фор Жевиш Импаст ташкилоти томонидан август ойида ўтказилган янги сўровнома шуни кўрсатдики, 7-октябр воқеаларидан сўнг исроилликларнинг ярмидан кўпи хорижда ўз миллатини ошкор қилишдан қўрқмоқда. Бу ҳақда Тҳе Жерусалем Пост хабар берди.
Сўровнома исроилликларга таъсир кўрсатаётган турли мавзуларни, жумладан, жамиятдаги ҳамжиҳатлик, диний келишмовчиликлар ва дипломатия масалаларини қамраб олди. Тадқиқотнинг асосий натижаларига кўра, респондентларнинг 52 фоизи хорижда бўлганида ўз миллатини ошкор қилишдан хавотирда эканини билдирган.
Респондентларнинг 41 фоизи 7-октябрдан кейин ўз хатти-ҳаракатларини ўзгартирганини, жумладан, сафар йўналишларини ўзгартирганини, режалаштирилган сафарларни бекор қилганини ёки муайян машғулотлардан қочганини айтган. Бунга дунёда антисемитик кайфият (яҳудийларга қарши муносабат) ва Исроилга нисбатан душманликнинг ошгани, шунингдек, Исроилнинг бошқа мамлакатлар билан муносабатлари ёмонлашгани сабаб бўлмоқда.
Сўровномада Исроилнинг халқаро дипломатияси ва тарғибот ишлари кескин танқид қилинди. Респондентларнинг 64 фоизи Исроил ва АҚШ ўртасидаги стратегик муносабатларни кучли деб баҳолаган бўлса-да, аҳолининг атиги 23 фоизи Исроил ўз сиёсати ва позициясини халқаро ҳамжамиятга самарали етказиб бера олмоқда, деб ҳисоблайди. Умуман олганда, респондентларнинг 70 фоизи Исроилнинг дипломатиясини самарасиз деб топди.
Исроилнинг глобал мавқейини тиклаш мумкин
Шунга қарамай, сўровнома жамоатчилик Исроилнинг ёмонлашган халқаро мавқеини тиклаб бўлмайдиган ҳолат деб ҳисобламаслигини кўрсатди. Респондентларнинг 33 фоизи мамлакатнинг глобал мавқейини яхшилаш учун энг муҳим қадам сифатида дипломатия ва коммуникация бўйича узоқ муддатли миллий стратегия ишлаб чиқишни кўрсатди.
Шунингдек, 25 фоиз одамлар ҳукумат сиёсати ва қарор қабул қилиш жараёнларини ўзгартириш зарур деб билади. Аҳолининг атиги 14 фоизи Исроилнинг халқаро обрўсини сезиларли даражада яхшилаб бўлмайди деган фикрда.
Сўровномада Исроил ва дунё яҳудийлари ўртасидаги алоқаларни кучайтириш ҳам кенг қўллаб-қувватланди. Аҳолининг 70 фоизи Исроил давлати диаспора жамоаларига ресурслар йўналтириши керак деб ҳисоблайди. Уларнинг 26 фоизи сармояларни Исроилга кўчиб ўтишни рағбатлантиришга йўналтиришни маъқуллаган.
Аҳолининг 23 фоизи яҳудий жамоаларини ҳимоя қилиш ва хавфсизлигини таъминлашни, 17 фоиз респондентлар эса фуқаролик жамияти ташкилотлари орқали ёрдам кўрсатишни афзал кўришини билдирган.