Исроил Эрон кимёвий қурол қўллаши мумкинлиги ҳақида АҚШни огоҳлантирди — НЙТ
Америкалик айрим амалдорлар бу огоҳлантиришга шубҳа билдириб, Исроил шу тариқа Эронга қарши урушни тикламоқчилигини таъкидлади.
Исроил Эрон кимёвий қурол ишлатиши мумкинлиги ҳақида АҚШни огоҳлантирди — НЙТ
Исроил разведкаси Эрон ўз рақибларига қарши кимёвий қурол қўллаши эҳтимоли борлиги ҳақида маълумот тўплаб, уни АҚШга етказди. Бу ҳақда манбаларга таянган ҳолда Тҳе Нев Ёрк Тимес хабар берди.
Баъзи америкалик амалдорлар бу огоҳлантиришга шубҳа билан қарамоқда. Уларнинг фикрича, Исроил ҳукумати шу орқали Трамп маъмуриятини Эронга қарши кенг кўламли ҳарбий ҳаракатларни қайта бошлашга кўндирмоқчи. Бироқ огоҳлантиришни жиддий қабул қилиш керак, деб ҳисоблайдиганлар ҳам бор.
Исроил разведка маълумотларини Форс кўрфази давлатлари билан ҳам бўлишган. Уларнинг айримлари Эрон кимёвий қурол ишлатишни режалаштираётганига шубҳа билдирган ва Исроил шу йўл билан урушни кучайтиришга уринаётганини айтган.
АҚШ бир неча бор Эрон кимёвий қуролга эга экани ёки уни ишлаб чиқишни режалаштираётгани ҳақида баён қилган. Теҳрон эса 1980-йиллардаги Эрон-Ироқ уруши даврида бундай қуролларни ишлаб чиққанини, кейин эса уларни йўқ қилганини билдирган.
Сўнгги ҳафталарда АҚШ Эронга янги зарбалар бериши мумкинлиги ҳақидаги хабарлар тарқалмоқда. Исроил бош вазири Бинямин Нетаняху ва АҚШ президенти Доналд Трамп 31-окябр куни телефон орқали гаплашган. Мазкур суҳбат чоғида Нетаняху президентдан Конгрессга сайловлардан кейин Эронга зарба беришни тиклашни сўрагани айтилмоқда.
3-октябрга ўтар кечаси АҚШ Эроннинг Қешм оролига зарба берди ва буни америкалик дронлар ўққа тутилганига жавоб деб изоҳлади. АҚШ президенти Доналд Трамп можарони исталган пайтда якунлаши мумкинлигини айтди ва Эрон билан ҳарбий зиддиятга сарфланган 30 миллиард долларни “арзимаган пул” деб атади.