Испанияда ўғрилар музейдан 3000 йиллик олтинларни тўрт дақиқада ўмарди
Испанияда ўғрилар музейдан 3000 йиллик олтинларни тўрт дақиқада ўмарди
Испанияда 27-август куни дунёдаги энг йирик Бронза даври олтин коллексияларидан бири ўғирлаб кетилди. Бу сўнгги ойларда Европа музейларида содир этилган бир қатор шов-шувли ўғриликларнинг навбатдагиси бўлди. Бу ҳақда Деуцче Велле хабар берди.
Испания шарқидаги Виллена музейига эрталабки босқин бор-йўғи тўрт дақиқа давом этди. Расмийлардан бири уларни жуда тезкор ва ўта профессионал деб таърифлади. Маълум бўлишича, бир гуруҳ ўғрилар “Виллена хазинаси” коллексиясининг деярли ҳаммасини олиб қочган. Улар фақат бир нечта буюмни қолдирган, холос.
**Ўғрилик қандай содир бўлди?**
“Виллена музейидаги сигнализация эрталаб соат 5:20 атрофида чалинган”, деди шаҳар кенгаши вакили.
Унинг қўшимча қилишича, ўғрилар тўрт дақиқа ичида бино тарк этган. Бу жуда тез ва профессионал операция бўлган. Аликанте провинсиясидаги бу кичик музейда Бронза даврига оид олтинлар тўплами асосий экспонат эди. Кейинги изланишлар бу олтинларнинг бир қисми метеорит металлидан ясалганини кўрсатган.
“Улар хазинанинг аксарият қисмини олиб кетди. Биз батамом ҳайратдамиз, ҳатто титраб кетяпман. Очиғи, Вилленада яшайдиган биз учун бу катта фожиа. Бу меросимиз ва бойлигимизнинг бир қисми эди”, деди Виллена мери Фулҳенсио Сердан журналистларга.
Испания ҳукуматининг Аликантедаги ўринбосари Мануел Пинеда берган маълумотга кўра, ўғрилар бир нечта машинада келган. Улар музейга дераза орқали киргани тахмин қилинмоқда. Мер Серданнинг айтишича, ўғрилар фақат учта кумуш идиш, битта билагузук, битта зирак ва тўртта тождан бирини қолдирган. Улар бу буюмларни қочаётганда тушириб юборган бўлиши мумкин.
“Барча хавфсизлик тизимлари ишга тушган”, деди Вильена вакили ва музей томондан ҳеч қандай камчилик бўлмаганини таъкидлади.
**“Виллена хазинаси” нима?**
“Виллена хазинаси” — бу 50 дан ортиқ асосан олтиндан ясалган буюмлар тўплами. Уни 1963-йилда археолог Ҳосе Мария Солер қуриган дарё ўзанидан топган. Бу буюмлар милоддан аввалги 1300–1000-йилларга тегишлидир. Олтин буюмлар орасида 11 та косача, учта бутилка ва 28 та билагузук бор.
Бу коллексия Вилленадан ташқари Мадрид, Аликанте, Токио ва Киото каби шаҳарларда ҳам кўргазмага қўйилган. Кейинчалик Виллена археология музейидаги бронзадан ясалган витринадан аслини олиб кетмаслик учун уларнинг икки тўплам нусхаси ясалган.
Ёдгорликларнинг тарихий қийматини баҳолаб бўлмайди. Бироқ ўғрилар бу машҳур экспонатларни қора бозорда ҳам сотишга қийналиши мумкин. Мернинг таъкидлашича, биргина олтиннинг ўзи тахминан 1,7 миллион евро ёки 2 миллион долларга баҳоланади.
Музей сайтига кўра, мутахассис тадқиқотчилар уни Бронза даврига оид энг муҳим олтин идишлар коллексияси деб ҳисоблайди. У, шунингдек, Ғарбий Европада темирдан фойдаланишнинг энг қадимги намунасидир. Сўнгги тадқиқотлар унинг икки қисми метеорит металидан ясалганини кўрсатди.
2025-йил октябр ойида Франсиянинг Лувр музейида ҳам ўғрилик содир бўлган эди. Ўшанда ўғрилар кундузи 10 дақиқадан кам вақт ичида миллионлаб доллар қийматидаги заргарлик буюмларини олиб қочган. Бу воқеа музей директорининг истеъфога чиқишига ва узоқ давом этган сиёсий жанжалга сабаб бўлди, шунингдек, музейнинг бир қисми узоқ вақтга ёпиб қўйилди.