Исландияни АҚШ байроғи остида кўрсатган Трамп харитаси сабаб Америка элчиси ТИВга чақиртирилди
Исландияни АҚШ байроғи остида акс эттирган Трамп харитаси ортидан Америка элчиси ТИВга чақиртирилди
Исландия 8-сентябр куни АҚШ элчисини Ташқи ишлар вазирлигига чақирди. Бунга Америка президенти Доналд Трампнинг ижтимоий тармоқда жойлаштирган сурати сабаб бўлди. Унда Исландия ва бошқа давлатлар АҚШ байроғи рангларида тасвирланган эди. Бу ҳақда Реутерс хабар берди.
Трамп эълон қилган харитада АҚШ, Канада, Гренландия, Исландия, Мексика, Марказий Америка ва Кариб денгизи ҳавзаси Америка байроғи остида кўрсатилган. Бутун қуруқлик “Америка Қўшма Штатлари” деб номланган. АҚШ президенти суратни Трутҳ Сосиалъдаги саҳифасига ҳеч қандай изоҳсиз жойлаштирган.
РУВ нашрига кўра, Исландия ташқи ишлар вазири Торгердур Гуннарсдоттир АҚШнинг ушбу мамлакатдаги элчиси Билли Лонгни чақиртирган. У ўз лавозимига август ойида расман киришган эди.
“Бу пост мутлақо номақбул экани ҳақидаги позиция аниқ етказилди”, дея хабар берган Исландия Ташқи ишлар вазирлиги телерадиокомпанияга.
АҚШ Давлат департаменти, Вашингтоннинг Копенгаген ва Рейкявикдаги элчихоналари ҳамда Нуукдаги консуллиги изоҳ сўровларига жавоб бермади. Исландия Ташқи ишлар вазирлиги ҳам қўшимча изоҳ билдирмади.
Трамп сўнгги пайтларда Даниянинг мухтор ҳудуди бўлган Гренландияни АҚШ эгаллаши кераклигини бир неча бор айтиб келмоқда. Бу Вашингтон ва Копенгаген ўртасида ҳамда бутун Европа бўйлаб кескинликни кучайтирди. Иккала давлат ҳам НАТО асосчиларидан ҳисобланади.
Август ойида Исландияда Европа Иттифоқига аъзо бўлиш бўйича музокараларни қайта бошлаш масаласида референдум ўтказилди. Унда аҳоли музокараларга қарши овоз берди. Бу жараёнда Трампнинг Гренландия ҳақидаги режалари ҳам муҳокама қилинган эди.
Музокаралар тарафдорларининг айримлари АҚШга ишонмагани сабабли Европа Иттифоқи билан яқинроқ муносабатларни таклиф қилган. Бироқ таҳлилчиларга кўра, овоз бериш натижасига асосан ички иқтисодий хавотирлар таъсир кўрсатган.
Трамп юқоридаги постни Европа Комиссияси президенти Урсула фон дер Ляеннинг Гренландияга ташрифидан бир неча соат ўтиб эълон қилди. Ташриф чоғида Европа Комиссияси Гренландияга 200 миллион евро (232,5 миллион доллар) инвестиция киритишини билдирган эди.
Дания бош вазири Метте Фредериксен Нуук шаҳрида Ритзау ахборот агентлигига берган интервюсида Гренландия халқи ва ҳукуматининг позицияси ўзгармаслигини айтди.
“Гренландия ҳукумати ва халқи америкалик бўлишни хоҳламаслигини қайта-қайта таъкидлаган. Умид қиламанки, бу борада АҚШда ҳам, дунёнинг бошқа жойларида ҳам ҳеч кимда шубҳа қолмаган”, деди у.