Иркутскда қизини калтаклаб, деразадан улоқтирган Ўзбекистон фуқароси судланди

Иркутскда суд қизини калтаклаб, деразадан улоқтирган Ўзбекистон фуқаросига нисбатан ҳукм чиқарди. Эркак етти йил-у олти ой муддатга қаттиқ тартибли колонияга ҳукм қилинди. У 17 ёшли қизини калтаклаб, сўнгра тўртинчи қаватдаги деразадан улоқтирган. Қиз кўплаб синиқ жароҳатларини олган.

Тергов аниқлашича, 2024 йил ноябрь ойида эркак машинада кўчадан ўтаётиб, 17 ёшли қизини бош кийимсиз кўриб қолган. Ўша вақтда у мактабда дарсда бўлиши керак эди. Ота машинани тўхтатиб, уни урган ва куч ишлатиб машинага ўтказган.

Йўл давомида, кейин эса уйда ҳам эркак қизини калтаклашда давом этган, жумладан, металл шланг билан урган. Можаро давомида у вояга етмаган қизни тўртинчи қаватдаги хонадоннинг очиқ деразасидан улоқтирган.

Қиз турли даражадаги кўплаб тан жароҳатлари олиб, шифохонага ётқизилган. Шифохонанинг ўзидаёқ у ҳуқуқ-тартибот идоралари ходимларига воқеа тафсилотларини сўзлаб берган ва отасига қарши кўрсатма берган.

Жиноят иши қотилликка суиқасд қилиш ва қийнаш моддалари бўйича қўзғатилган. Судланувчи айбини тан олмаган, бироқ суд давлат айбловчисининг позициясига қўшилиб, унга нисбатан қаттиқ тартибли колонияда етти йил-у олти ой муддатга озодликдан маҳрум қилиш жазосини тайинлади.

Аввалроқ Қашқадарё вилоятининг Муборак туманида отаси томонидан калтакланиши оқибатида 15 ёшли қиз вафот этган эди. Бунга ўсмир қизнинг рухсатсиз олган 400 минг сўм пули сабаб бўлган.