Иқтисодиётда давлат иштироки қисқармоқда
Давлат корхоналари ва муассасаларини сақлаб қолиш, хусусийлаштириш, қайта ташкил этиш ёки тугатиш зарурлигини аниқлаш учун уларнинг фаолиятини ҳар йили баҳолаш тизими жорий этилмоқда. Давлат улушларини хусусийлаштиришдан олдин Рақобатни ривожлантириш ва истеъмолчилар ҳуқуқларини ҳимоя қилиш қўмитасининг тегишли соҳадаги рақобат ҳолати тўғрисидаги хулосасини олиш ҳам талаб этилади.
Иқтисодиётда давлат иштироки қисқартирилмоқда
Иқтисодиётда давлат иштирокини қисқартириш ва рақобат муҳитини ривожлантириш бўйича қўшимча чора-тадбирлар тасдиқланди.
Ҳужжат давлат мулкини бошқариш ва хусусийлаштириш тўғрисидаги қонунчиликни амалга ошириш, шунингдек, давлат институтларини ислоҳ қилишни жадаллаштириш мақсадида қабул қилинган.
Давлат корхоналари ҳар йили хатловдан ўтказилади
Белгиланган мезонларга мувофиқ, давлат органлари Давлат активларини бошқариш агентлиги ва бошқа манфаатдор идоралар билан биргаликда ҳар йили давлат корхоналари фаолиятини хатловдан ўтказади.
Баҳолаш якунлари бўйича сақлаб қолиш, хусусийлаштириш, тугатиш ёки қайта ташкил этиш таклиф этилаётган корхоналар рўйхати шакллантирилади. Тайёрланган рўйхат тасдиқлаш учун Вазирлар Маҳкамасига тақдим этилади.
Бунда хўжалик юритувчи субъектнинг устав фонди ёки капиталидаги давлат улуши хусусийлаштирилишидан олдин Рақобатни ривожлантириш қўмитаси ёки унинг ҳудудий бўлинмасининг тегишли фаолият соҳасидаги рақобат ҳолати тўғрисидаги хулосаси талаб этилади.
Давлат муассасалари ҳам баҳоланади
Рақобатни ривожлантириш қўмитаси тегишли вазирлик ва идоралар билан биргаликда ҳар йили 1 майга қадар давлат муассасалари фаолиятини шарҳлаб боради.
Таҳлил натижаларига кўра, Давлат активларини бошқариш агентлигига ушбу муассасаларни хусусийлаштириш ёки тугатиш тўғрисида таклифлар юборилади.
Бундан ташқари, давлат акция пакетлари ёки улушларини хусусийлаштириш режалаштирилаётган хўжалик юритувчи субъектлар ва давлат муассасалари фаолият соҳаларидаги рақобат ҳолати тўғрисида монополияга қарши органнинг хулосаларини тайёрлаш ва кўриб чиқиш тартиби тасдиқланди.
Давлат муассасаларини хусусийлаштириш, сақлаб қолиш ёки тугатиш тўғрисидаги таклифларни тайёрлаш ва кўриб чиқиш тартиби алоҳида белгиланди.
Ҳужжат Қонунчилик маълумотлари миллий базасида давлат тилида эълон қилинган ва 30.09.2026 й.дан кучга кирди.