Иқтисодий ўсиш: Ҳиндистон етакчи, Россия ортда
2026-йилда Г20 иқтисодиётлари орасида энг юқори ўсиш Ҳиндистонда кутилмоқда - 6,4 фоиз. Индонезия ва Хитой ҳам етакчилар қаторида. Россия иқтисодиёти учун 1,1 фоиз, Италия учун эса 0,5 фоиз ўсиш прогноз қилинган.
**Иқтисодий ўсиш: Ҳиндистон олдинда, Россия ортда**
Висуал Сапиталист эълон қилган рейтингда «Катта йигирматалик» — Г20 аъзолари 2026-йилдаги реал ялпи ички маҳсулот ўсиши прогнози бўйича солиштирилган. Материалда айтилишича, ҳисоб-китоблар учун Халқаро валюта жамғармасининг Ворлд Эсономис Оутлоок ҳисоботидаги янгиланган прогнозлар асос қилиб олинган.
Геосиёсий зиддиятлар ва таъминот занжирларидаги узилишларга қарамай, жаҳон иқтисодиётининг 2026-йилда 3 фоизга ўсиши кутилмоқда. Аммо йирик иқтисодиётлар ўсиш суръатлари жиҳатидан бир-биридан анча фарқ қилади.
Реал ЯИМ ўсиши инфляция таъсирини ҳисобга олмайди. Шу сабабли бу кўрсаткич ишлаб чиқарилган товарлар ва кўрсатилган хизматлар ҳажмидаги ўзгаришни баҳолашга ёрдам беради.
2023-йилда Г20 таркибига қўшилган Африка Иттифоқи рейтингга киритилмаган. Материалда бунга бу бирлашма ягона иқтисодиёт ёки умумий бозор эмаслиги сабаб қилиб кўрсатилган.
**Осиё мамлакатлари етакчилик қилмоқда**
Рейтингнинг юқори поғоналарини Осиё давлатлари эгаллаган. Ҳиндистон иқтисодиётининг 6,4 фоизга, Индонезияники 5 фоизга, Хитойники эса 4,6 фоизга ўсиши прогноз қилинган.
Ҳиндистондаги ўсишни йирик давлат инвестициялари ва барқарор истеъмол харажатлари қўллаб-қувватламоқда.
Материалдаги прогнозга кўра, Ҳиндистон 2026-йилда дунёнинг энг йирик иқтисодиётлари орасида олтинчи ўриндан 2031-йилга бориб учинчи ўринга чиқиши мумкин. Банкир Жейми Даймон ҳам Ҳиндистон иқтисодиёти яқин ўн йилда уч бараварга ошиши мумкинлигини айтган.
Индонезия табиий ресурслари ва хомашё нархларининг юқорилигидан фойдаланиб, мамлакат ичида қайта ишлаш саноати ҳамда инфратузилмани ривожлантирмоқда.
Ушбу уч мамлакат ичида иқтисодиёти энг йириги бўлган Хитой учун 4,6 фоизлик ўсиш аввалги ўн йилликлардаги суръатлардан анча паст. Кўчмас мулк бозоридаги заифлик ва кучайиб бораётган демографик босим иқтисодий ўсишни чеклаётган омиллар сифатида қайд этилган.
**Европада ўсиш суст бўлиши кутилмоқда**
Европа мамлакатлари рейтингнинг пастки қисмида кўпроқ жой олган. Прогнозга кўра, 27 давлатни бирлаштирувчи Европа Иттифоқи иқтисодиёти 1,2 фоизга, Россия иқтисодиёти эса 1,1 фоизга ўсади.