Ипотека банк ОТП Гроуп ва Ўзбекистоннинг Венгриядаги элчихонаси техник таълим ва касбий ривожланишни қўллаб-қувватламоқда
Ипотека банк ОТП Гроуп ва Ўзбекистоннинг Венгриядаги элчихонаси замонавий касб-ҳунар таълимини ривожлантириш ҳамда халқаро тажриба алмашинуви орқали малакали кадрлар салоҳиятини оширишга қаратилган ҳамкорликни изчил кенгайтирмоқда.
**Ипотека банк ОТП Гроуп ва Ўзбекистоннинг Венгриядаги элчихонаси техник таълим ҳамда касбий ривожланишни қўллаб-қувватламоқда**
Қўшма ташаббуслар Ўзбекистоннинг учта ҳудудидаги техник таълим муассасаларининг моддий-техник базасини мустаҳкамлаш, шунингдек, мутахассислар учун Венгрияда стажировка ўташ ва касбий малакани ошириш имкониятларини кенгайтиришни кўзда тутади.
**2026-йил 11-август куни**
Ипотека банк ОТП Гроуп бошқарув раиси Адам Сзентпетери Ўзбекистоннинг Венгриядаги фавқулодда ва мухтор элчиси Ойбек Шахавдинов билан учрашди. Суҳбат чоғида томонлар ОТП Гроупънинг Ўзбекистондаги фаолияти натижалари, ўзаро ҳамкорликни янада кенгайтириш истиқболлари ҳамда техник таълимни ривожлантириш ва малакали кадрлар тайёрлашга йўналтирилган қўшма ташаббусларни амалга ошириш масалаларини муҳокама қилдилар.
Таълим соҳасидаги ҳамкорликни кенгайтириш доирасида Ўзбекистоннинг ҳудудий техник таълим муассасаларини қўллаб-қувватлашга алоҳида эътибор қаратилмоқда. Хусусан, Андижон вилояти Булоқбоши тумани 2-сон техникуми, Қашқадарё вилояти Қарши тумани 2-сон техникуми ҳамда Жиззах вилоятидаги Абу Али ибн Сино номидаги Дўстлик жамоат саломатлиги техникуми замонавий ускуналар билан таъминланиши режалаштирилган. Мазкур ташаббус техник таълим сифатини ошириш, амалий тайёргарлик имкониятларини кенгайтириш ва малакали кадрлар тайёрлашга муносиб ҳисса қўшишга қаратилган.
Шунингдек, томонлар Ўзбекистоннинг соғлиқни сақлаш, суд-ҳуқуқ ҳамда маданият соҳаларида фаолият юритаётган мутахассислар учун Венгрияда стажировка ва касбий ривожланиш дастурларини ташкил этиш истиқболларини ҳам кўриб чиқдилар.
Лойиҳаларни Ўзбекистон мустақиллигининг 35 йиллигига бағишланган тадбирлар доирасида ОТП Гроуп грант кўмагида амалга ошириш режалаштирилмоқда. Ташаббуслар талабалар ва мутахассислар учун замонавий ускуналардан фойдаланиш, амалий кўникмаларни ривожлантириш ҳамда халқаро тажрибани ўзлаштириш имкониятларини кенгайтиришга хизмат қилади.
Ипотека банк ОТП Гроуп бошқарув раиси Адам Сзентпетери:
“Ўзбекистонда касб-ҳунар таълимини ривожлантириш ва ёш мутахассисларнинг касбий салоҳиятини юксалтиришга қаратилган ташаббусларни қўллаб-қувватлаш имкониятидан мамнунмиз. Замонавий ускуналар билан таъминлаш ва халқаро тажриба алмашинуви учун қўшимча имкониятлар яратиш таълим сифатини ошириш, малакали кадрлар тайёрлаш ҳамда Ўзбекистон ва Венгрия ўртасидаги самарали ҳамкорликни янада мустаҳкамлашга хизмат қилади”.
Таълим соҳасига инвестициялар Ипотека банк ОТП Гроупънинг инсон капиталини ривожлантириш, малакали кадрлар тайёрлаш ва Ўзбекистоннинг барқарор ижтимоий-иқтисодий тараққиётига ҳисса қўшишга қаратилган узоқ муддатли стратегиясининг муҳим қисмидир.