Ипакчилик илмий-тадқиқот институти ҳудудида кўли бўлган парк барпо этилмоқда. Уни Саида Мирзиёева бориб кўрди
АП раҳбари Саида Мирзиёева Тошкентдаги собиқ Ипакчилик илмий-тадқиқот институти ўрнида барпо этиладиган бўлажак парк ҳудудини кўздан кечирди. «Бу ерда кўл, кўплаб яшил майдонлар, сайр қилиш, спорт ва дам олиш масканлари пайдо бўлади... Бундай ҳудудлар пойтахтнинг барча туманларида бўлиши керак. Шаҳарда паркларни янада фаолроқ ташкил этиш лозим», — деб маълум қилди у.
Ипакчилик илмий-тадқиқот институти ҳудудида кўлли парк барпо этилмоқда. Уни Саида Мирзиёева бориб кўрди
Ўзбекистон Президенти Администрацияси раҳбари Саида Мирзиёева Тошкент шаҳрининг Шайхонтоҳур туманидаги собиқ Ипакчилик илмий-тадқиқот институти ўрнида барпо этилаётган бўлажак парк ҳудудини бориб кўрди. Бу ҳақда унинг Telegram-каналида маълум қилинди.
«Бу ерда кўл, кўплаб яшил майдонлар, сайр қилиш, спорт билан шуғулланиш ва болалар билан дам олиш учун жойлар пайдо бўлади», — деб хабар берди у. Саида Мирзиёевага ПАнинг бошқа вакиллари, шунингдек, пойтахт ҳокими Шавкат Умурзоқов ва мамлакат бош прокурори ўринбосари Салом Самадов ҳамроҳлик қилди.
«Тошкентга кўпроқ яшил ҳудудлар керак. Айниқса, дарахтлар, сув ва соя-салқин фуқаролар ҳаёт сифатига бевосита таъсир кўрсатадиган иссиқ иқлимимизда бу жуда муҳим», — дея таъкидлади администрация раҳбари.
«Бундай ҳудудлар пойтахтнинг барча туманларида бўлиши керак. Шаҳарда паркларни фаолроқ ташкил этиш, мавжуд яшил майдонларни асраб-авайлаш ва янги экологик тоза массивлар яратиш зарур. Бу Тошкентни ривожлантиришнинг муҳим йўналишларидан бири бўлиб, бу борадаги ишларни давом эттирамиз», — деб қайд этди у.
2023 йилда Ўзбекистон ипакчилик илмий-тадқиқот институтини Андижон вилоятининг Марҳамат туманига кўчириш тўғрисида қарор қабул қилинган эди. Ўшанда институт ҳудудида 19 минг туп дарахт, асосан тут, шунингдек, бошқа турдаги дарахтлар ўсиши хабар қилинганди. Унинг биноси 1960-йилларда қурилган.
Бир пайтлар институт 100 гектар майдонни эгаллаган. Ҳудудда турар жой бинолари қурилиши натижасида у 20 гектардан камроққа қисқарган. Маҳаллий аҳоли дарахтларни сақлаб қолиш ва ҳудудда қурилишлар қилинишига йўл қўймаслик учун унга миллий парк мақомини беришни сўраб мурожаат қилган эди.
2025 йил баҳорида Шайхонтоҳур тумани ҳокимлиги бу ерда экопарк ташкил этилиши ва дарахтлар сони 2 бараварга кўпайтирилишини маълум қилди. Дарахтларни кўчириб ўтказиш ишлари бошланди. Шу билан бирга, лойиҳа рендерларида кўнгилочар парк ҳақида сўз борган эди.
Жорий йилдаги сунъий йўлдош тасвирларида ҳудудда аллақачон доира ва овал шаклидаги пиёдалар йўлаклари яратилганини кўриш мумкин.
Янги эскизларда фавворали ва атрофида йўлак бўлган катта чўзиқ сув ҳавзаси, шунингдек, ҳовузли канал ва бир нечта кичик сув ҳавзаларини пайқаш мумкин.