Индонезияда паром ҳалокатга учради. 130 киши бедарак йўқолган
100 дан ортиқ киши қутқарилиб, 6 кишининг жасади топилган.
Индонезияда паром фалокатга учради. 130 киши йўқолган
Якшанбага ўтар кечаси Ява денгизида Вирго Транспорт 8 компаниясига тегишли, бортида жами 243 киши бўлган йўловчи пароми чўкиб кетди. Ҳодиса натижасида олти киши ҳалок бўлгани тасдиқланди, 107 киши қутқарилди. Яна 130 кишининг қаердалиги номаълум қолмоқда.
Кема шанба куни Ява оролидаги Сурабая шаҳридан Калимантан ороли (Борнео) жанубидаги Банжармасин шаҳри сари йўл олганди. Денгиз орқали қатнов вақтида об-ҳаво ёмонлашган. Капитан кема бир томонга оғиб қолганини билдирган, кема билан алоқа узилгач эса ҳукумат қидирув ишларини бошлаган.
Кейинроқ кема ағдарилиб, чўкиб кетгани аниқланди. Бортда 213 нафар йўловчи ва экипажнинг 30 аъзоси бўлган.
Қутқарувчиларнинг айтишича, кема охирги марта алоқада бўлган пайтда соҳилдан тахминан 148 километр узоқликда ҳаракатланаётган эди. Ҳодиса жойига 4 та кемадаги қутқарув гуруҳлари ҳамда вертолётлар юборилди.
Қутқарувчилар ҳалокатдан омон қолган 107 кишини ва 6 кишининг жасадини сувдан олиб чиқишди, яна 130 кишини қидириш давом этмоқда.
Якшанба куни Банжармасиндаги Трисакти портидаги бошқарув пунктига кемадагиларнинг юзлаб қариндошлари йиғилиб, яқинлари ҳақида хабар кутишди.
«Мен йўловчилар рўйхатида амакимнинг исмини кўриб, карахт ҳолатга тушдим. Аммо расмий шахслар у қутқарилганини айтишганидан кейин ўзимни бироз енгил ҳис қила бошладим», деган улардан бири журналистларга.
Индонезия 17 мингдан ортиқ архипелагдан иборат бўлиб, бу ерда паром асосий транспорт воситаларидан бири саналади. Мамлакатда йўловчи кемалари билан боғлиқ ҳодисалар тез-тез юз беради ва кўпинча бунга хавфсизлик чораларига амал қилинмагани сабаб қилиб кўрсатилади.
Ўтган ой Индонезиянинг Бали ороли яқинида паромда ёнғин чиқиши оқибатида бир киши ҳалок бўлиб, 4 киши бедарак йўқолган, 211 киши қутқарилганди. Ундан икки ҳафта олдин эса «Мутира Сентос 2» номли яна бир паром Ява ороли яқинида ёниб кетиши оқибатида беш киши ҳалок бўлганди.