Индонезияда сайёҳлар пароми ёниб кетди, 172 киши қутқарилди (видео)
Индонезияда сайёҳлар пароми ёниб кетди, 172 киши қутқарилди (видео)
Индонезия расмийлари 12-август куни Бали ороли яқинида ёнаётган паромдан 172 кишини қутқариб олди. Деуцче Велле хабарига кўра, ушбу ҳодиса оқибатида камида бир киши, яъни 19 ёшли аёл ҳалок бўлган.
Ёнғин Бали ва Ломбок оролларини боғловчи Паданг-Бай — Лембар йўналишида ҳаракатланувчи паромда содир бўлган. Бу йўналишдан сайёҳлар ҳам фаол фойдаланади.
**Қутқарув ишлари ҳақида маълумотлар**
Матарам қидирув ва қутқарув бошқармаси раҳбари Муҳаммад Ҳариядининг дастлабки маълумотларига кўра, барча йўловчилар эвакуация қилинган эди. У шундай деган: “Биз кемага яқинлашдик ва барча йўловчилар кемани тарк этганини тасдиқладик. Кема бортида ҳеч ким кўринмади”.
Бироқ кўп ўтмай, Ҳарияди журналистларга бир нафар аёлнинг вафот этганини маълум қилди. Паданг-Бай порти томонидан берилган рўйхатга кўра, паромда 114 нафар йўловчи ва 17 нафар экипаж аъзоси бўлиши тахмин қилинган эди. Аммо қутқариб олинган ва ҳалок бўлганларнинг умумий сони тахмин қилинган 131 кишидан анча кўп бўлиб чиқди.
**Ёнғин қандай содир бўлди?**
Путри Ясмин паромида ёнғин маҳаллий вақт билан эрталабки соат 04:15 да бошланган. Кема Балидаги Паданг-Бай портидан Ломбокдаги Лембар портига йўл олган эди. Қутқарув хизмати фавқулодда хабарни ярим соатдан кейин олган ва дарҳол қутқарув кемалари ҳамда ходимларини воқеа жойига жўнатган.
Омон қолган 25 ёшли Кики Окта Прадиканинг сўзларига кўра, у қутқарув нимчасини олиб, бошқа йўловчилар билан бирга сувга сакраган. “Ёрдам келгунича бир неча соат ўтди”, деди у.
Муҳаммад Ҳариядининг таъкидлашича, денгизда 4 метргача бўлган кучли тўлқинлар кузатилган. Бу ҳолат қутқарув ишларини қийинлаштирган. Атрофда бўлган бошқа бир паром 30 нафар йўловчини қутқариб, Балига олиб борган. Қидирув-қутқарув кемаси эса 59 нафар йўловчи билан Лембар портига йўл олган. Яна 17 нафар йўловчини ҳарбий-денгиз флоти кемаси қутқариб олган.
Бу Индонезияда шу ойнинг ўзида юз берган иккинчи йирик паром ёнғинидир. 2-август куни бортида 271 киши бўлган паром денгизда ёниб кетган. Ҳодиса оқибатида 5 киши ҳалок бўлган, 41 киши эса бедарак йўқолганди.