Илонлар тўла чамоданли эркак Германия аэропортида ушланди
Расмийларнинг айтишича, мексикалик ўт ўчирувчи бўлган бу эркак Кёльн аэропортини тарк этишга уринаётганда «ҳаяжонланган» кўринишда бўлган.
** Германия аэропортида чемодани илонларга тўла эркак ушланди**
** Расмийларнинг билдиришича, илонлар ва калтакесакларнинг ҳаммаси ҳам тирик бўлмаган**
Германиядаги Кёлн Бонн аэропортида 90 дан ортиқ калтакесак ва заҳарли илонларни ноқонуний олиб киришга уринган эркак ушланди.
Божхона ходимларининг айтишича, 45 ёшли мексикалик ўт ўчирувчи аэропортнинг яшил — декларация қилинадиган ҳеч нарса йўқ — чиқиш йўлагидан ўтишга уринаётганда «шубҳали даражада асабийлашган».
Улар эркакда гиёҳванд моддалар тестини ўтказишган ва у кокаин учун мусбат натижа кўрсатган, шундан сўнг унинг чемодани тинтув қилинган.
Ҳеч қандай гиёҳванд модда топилмаган, аммо ходимлар шампунь ва крем идишларига, пластик контейнерларга ва пайпоқ ғарамларига яширилган қора-илонлар, чақир-илонлар ҳамда илон ва калтакесакларнинг бошқа турларини, жумладан игуаналарни топишган.
«Аэропортдаги ҳамкасбларим чемоданлардаги эсдалик совғаларига келганда кўп нарсага ўрганиб қолишган, аммо Мексикадан келтирилган 37 та тирик заҳарли илон ва 55 та калтакесак илгари ҳеч қачон бўлмаган», деди Кёлн божхона бошқармаси матбуот котиби Йенс Аҳланд.
Аҳланднинг айтишича, баъзи ҳайвонлар «инсонийликка зид шароитларда» сақланган. Бошқалари эса Мехикодан Истанбул орқали амалга оширилган саёҳат давомида нобуд бўлган.
Исми ошкор этилмаган эркак ходимларга ҳайвонларни бразилиялик танишининг илтимосига кўра олиб келганини айтган.
Унинг Германияга кириши рад этилган ва Истанбулга қайтариб юборилган.
Тирик қолган ҳайвонлар ҳозирда Германиядаги илон фермасида парвариш қилинмоқда.
«Ўтган йили мамлакат бўйлаб 56 600 дан ортиқ ҳимояланган ҳайвон ва ўсимликлар ёки улардан тайёрланган маҳсулотлар билан боғлиқ 1 300 дан ортиқ мусодара ҳолати қайд этилди», деди Божхона матбуот котиби.
Олти йил муқаддам Кёлн Бонн аэропорти божхона ходимлари томонидан Мексикадан ўйинчоқлар ва ширинликлар почкалари ичида контрабанда йўли билан олиб келинган 26 та камёб судралиб юрувчи топилган эди, улардан 10 таси ўлик бўлган.
Улар Германиядаги шахсий харидорлар учун мўлжалланган эди.