Токио аеропортида пайпоқ ичига 200 та калтакесак яширган эркак қўлга олинди

Токио аеропортида пайпоққа яширилган 200 та калтакесак билан эркак қўлга олинди.

Токионинг Ҳанеда аеропортида мексикалик эркак ҳибсга олинди. Божхона ходимлари унинг чамадонидаги 22 жуфт пайпоқ ичидан 200 га яқин калтакесак топди. Бу ҳақда Тҳе Индепендент хабар берди.

23 ёшли Даниел Исаак Веласко Балтазар 8-август куни судралиб юрувчиларни Жанубий Кореядан Японияга декларациясиз олиб киришга уринганликда айбланмоқда. Бу мамлакат божхона қонунчилигини бузиш ҳисобланади. Токио шаҳар ИИБ у жонзотларни рухсациз олиб кирганини тан олганини маълум қилди.

Чамадон очилганда калтакесаклардан бири ўлик ҳолда топилган. Уларнинг 9 таси Мексика аллигатор калтакесаги бўлган. Бу тур фақат Мексиканинг тоғли ўрмонларида учрайди. У Йўқолиб кетиш хавфи остидаги турларнинг халқаро савдоси тўғрисидаги конвенсияга киритилган. Ушбу турдаги жонзотларни чегарадан олиб ўтиш учун ҳукумат рухсати талаб қилинади.

Гумондорнинг терговчиларга айтишича, у калтакесакларнинг ҳар бирини Мексикада 560 (3,5 доллар) дан 750 иена (4,71 доллар)гача бўлган нархда сотиб олган. Бу ҳайвонлар Японияда жуда камёб ҳисобланади. У ерда уларнинг биттаси тахминан 100 минг иена (628 доллар)га сотилади.

Июл ойининг охирида Токио полициясига аноним хабар келиб тушган эди. Унда мексикалик фуқаро амфибия ва судралиб юрувчилар кўргазма-савдоси учун калтакесакларни ноқонуний олиб кирмоқчи экани айтилган.

Шундан сўнг Ҳанеда аеропорти божхона ходимлари огоҳликни оширган. Эркак етиб келганида унинг чамадони текширилган. Жонзотлар пайпоқлар ичида ва футболкаларга ўралган ҳолда топилган. Чамадонда Мексика аллигатор калтакесагидан ташқари бошқа турлар ҳам бўлган. Ҳукумат вакиллари улар қайси турга тегишли эканини аниқламоқда.

Мексика аллигатор калтакесаклари оч-яшил рангда бўлади ва секин ҳаракатланади. Улар Марказий Мексиканинг Сиерра-Мадре қарағай ва эмон ўрмонларида яшайди. У ерда дарахтларнинг кесилиши ва уй ҳайвони сифатида ушланиши сабабли уларнинг сони камайиб кетган. Бу тур йўқолиб кетиш хавфи остида деб таснифланган.

Япония экзотик судралиб юрувчилар учун дунёдаги энг йирик бозорлардан биридир. Аеропортларда контрабанда ҳайвонларининг ушланиши бу ерда тез-тез учраб туради. Аввалроқ, хусусан, Кенияда ҳар бири 200 доллар турадиган чумолиларни олиб чиқиб кетишга уринган хитойлик эркак бир йилга қамалгани ҳақида хабар берилганди.