Илон Маскнинг собиқ севгилиси миллиардер ҳақидаги ҳужжатли фильмда иштирок этиш учун 40 миллион доллардан воз кечди

Илон Маскнинг собиқ маҳбубаси миллиардер ҳақидаги ҳужжатли фильмда иштирок этиш учун 40 миллион доллардан воз кечди

Эшли Сент-Клер сир сақлаш тўғрисидаги келишувни (NDA) имзолаш эвазига таклиф қилинган 40 миллион долларни қабул қилмаганини маълум қилди. Унинг сўзларига кўра, Илон Маск ушбу пулни ўзининг иштирокисиз янги «Маск» ҳужжатли фильми суратга олинишини таъминлаш учун таклиф қилган. Фильм премьераси 8 сентябрь куни Венеция кинофестивалида бўлиб ўтди.

Сент-Клер — X ижтимоий тармоғида бир миллион обуначига эга бўлган ўнг радикал сиёсий шарҳловчи. Ўтган йили у ўғил фарзанд дунёга келтирган бўлиб, у миллиардернинг 13-фарзанди экани айтилади.

Венециядаги матбуот анжуманида у ўз рад жавобини молиявий мустақиллиги ва маънавий тамойиллари билан изоҳлади:

«Мен фарзандларимга ўрнак кўрсатмоқчиман: моддий қулайликни ҳеч қачон ҳақиқатдан устун қўймаслик керак.

Сукут сақлаш учун сизга шунча миқдорда пул таклиф қилишса, савол туғилади: улар менинг гапирадиган гапларимдан нега бунчалик қўрқишди?».

Режиссёр Алекс Гибнининг тўрт соатлик ҳужжатли фильми Илон Маск билан боғлиқ бир нечта шов-шувли мавзуларга тўхталади. Хусусан, унда Дональд Трамп маъмурияти ҳузуридаги Давлат самарадорлиги департаменти (DOGE) фаолияти давомида Маскнинг оддий ходимлари америкаликларнинг махфий шахсий маълумотларига кириш ҳуқуқини қўлга киритгани таъкидланади.

Бундан ташқари, Tesla собиқ муҳандислари автопилот тизимини ишлаб чиқиш хавфсизлик талабларига эътибор бермай тезлаштирилганини, бу эса бир қатор ўлим билан якунланган бахтсиз ҳодисаларга олиб келганини даъво қилишди (Tesla бу айбловларни қатъиян рад этади).

Шунингдек, картина муаллифлари Маскнинг Трампни қўллаб-қувватлашига демократлар ғалаба қозонган тақдирда унинг бизнеси устидан эҳтимолий терговлар бошланишидан қўрқиш сабаб бўлганини таъкидламоқдалар.

Режиссёр Алекс Гибнининг сўзларига кўра, суратга олиш ишлари босим остида ўтган: «Маскнинг танқидчилари орасида ҳам, бизнес шериклари орасида ҳам очиқ гапиришдан деярли экзистенциал қўрқув ҳукмрон эди». Шу билан бирга, фильмда миллиардернинг биринчи рафиқаси Жастин Маск ва унинг отаси Эррол Маск ҳам иштирок этган.

Илон Маскнинг ўзи лойиҳани аллақачон танқид остига олиб, X тармоғида Гибни унга нисбатан ғаразли муносабатда эканини ва «дахшатли туҳматдан иборат материал» суратга олганини маълум қилди.