Ҳокимиятлар тайёр қурилиш рухсатномалари билан ер сотиш ҳуқуқига эга бўлди
Ҳокимиятлар ерларни тайёр қурилиш рухсатномалари билан сотиш ҳуқуқига эга бўлди
Ўзбекистонда ер участкаларини «тайёр пакет» форматида сотиш механизми жорий этилди. Ҳокимиятлар ерларни олдиндан тайёрланган техник шартлар ва қурилиш учун зарур рухсатномалар билан савдога чиқариши мумкин бўлади.
Бу президентнинг хусусийлаштиришни тезлаштириш тўғрисидаги 177-сонли фармонида назарда тутилган. Бундай «пакет»ни тайёрлаш харажатлари маҳаллий бюджетдан қопланади, сўнгра лотнинг бошланғич қийматига киритилади. Янги механизм биринчи навбатда мастер-режалар ишлаб чиқилган ҳудудларда қўлланилади.
Агар ер участкасини нархи пасайтирилгандан кейин ҳам сотишнинг иложи бўлмаса, у компания устав капиталидаги улуш эвазига лойиҳани амалга ошириш учун бизнесга топширилиши мумкин. Кейинчалик тадбиркор ушбу улушни қайтариб сотиб олиши мумкин бўлади.
Бундан ташқари, давлат мулки қийматининг камида 50 фоизини тўлаган инвесторларга сотиб олинган объектларни реконструкция қилиш ёки янги қурилиш учун уларни бузиб ташлашга рухсат берилади. Тошкент шаҳри саноат зоналари иштирокчилари инвестиция ва ижтимоий мажбуриятларни бажаргандан сўнг бино ва ерларни сотиб олишлари мумкин бўлади.
Аввалроқ Ўзбекистонда ер участкаларини аукционларга тайёр қурилиш рухсатномалари билан чиқариш режалаштирилаётгани хабар қилинган эди. Ўшанда тадбиркорлар рухсат берувчи ҳужжатларни олиш учун 6 ойдан 12 ойгача вақт сарфламасдан, ерни сотиб олгандан сўнг дарҳол қурилишни бошлашлари мумкинлиги таъкидланган эди.