Ҳокимият органлари 200 минг нафар қашқадарёликни даромадли қишлоқ хўжалигига жалб қилишни режалаштирмоқда

Ҳокимият Қашқадарёнинг 200 минг аҳолисини даромадли қишлоқ хўжалигига жалб қилишни режалаштирмоқда

Қашқадарё вилоятида қишлоқ хўжалигини ривожлантириш туфайли 200 минг киши қўшимча даромад олиши мумкин бўлади. 100 минг гектар яйловда дронлар ёрдамида қурғоқчилик ва тузга чидамли озуқа экинларини экиш йўлга қўйилади.

Президентнинг вилоятни ривожлантириш бўйича ўтказилган йиғилишида маълум қилинишича, ишлар Миср тажрибаси асосида ва Жаҳон банки билан ҳамкорликда саккизта туманда олиб борилади. Бундан ташқари, 10 минг бош йирик шохли ва 50 минг бош майда шохли мол учун мажмуалар ташкил этиш вазифаси қўйилди. Импорт қилинган чорва моллари аҳолига сотилганда ҚҚСнинг ноль ставкаси қўлланилади.

Ғузор туманида 10 минг гектар ер муомалага киритилади. Майдоннинг ярмини пахта, қолган қисмини озуқа экинлари эгаллайди. Ерлар деҳқонларга берилади, шунингдек, кластер тизими йўлга қўйилади. Ерларни муомалага киритиш учун бир ҳафта муддатда имтиёзлар пакетини тайёрлаш топширилди. Космик маълумотларга кўра, вилоятда муомалага киритиш мумкин бўлган яна 30 минг гектар ер аниқланди.

Президент далаларга сув етказиб бериш мураккаб ва қимматга тушаётганига эътибор қаратди. Шу боис келаси йили 265 километр каналлар бетонлаштирилади ва 20 та насос янгиланади. Бу ишларга 550 миллиард сўм ажратилади. 2027 йилда фермерлар билан ҳамкорликда 75 минг гектар майдонда сувни тежайдиган технологиялар жорий этилади.

Бу йил Косон, Нишон, Қамаши ва Миришкорда ҳар бирининг ҳажми 50 минг кубометрдан бўлган тўртта кичик сув омбори қурилди. 1 июнга қадар бешта туманда яна иккитадан шундай объект қурилади.

Йиғилишда Шавкат Мирзиёев Қашқадарё бир-икки йил ичида мамлакатнинг илғор ҳудудлари қаторига кириши мумкинлигини таъкидлади. Бунинг учун, давлат раҳбарининг сўзларига кўра, туман ҳокимлари ва банклар билим рағбатлантириладиган, меҳнат қилиш учун имкониятлар яратиладиган ва ташаббуслар қўллаб-қувватланадиган муҳитни яратишлари керак.