Ҳиндистондаги мудҳиш қотиллик иши бўйича оқланган эркак ўлик ҳолда топилди
50 ёшли эркак ўтган йилнинг ноябрь ойида Ҳиндистон олий суди томонидан барча айбловлардан озод этилган эди.
Ҳиндистондаги даҳшатли қотиллик иши бўйича оқланган эркак ўлик ҳолда топилди
Суриндер Коли ўтган йили Ҳиндистон Олий суди томонидан 19 нафар бола ва аёлнинг шафқатсизларча ўлдирилиши билан боғлиқ иш бўйича оқланган эди
Оммавий ахборот воситаларининг хабарларига кўра, Ҳиндистоннинг энг машҳур қотиллик ишларидан бири бўйича деярли 20 йил панжара ортида ўтирган эркак озодликка чиққанидан бир неча ой ўтиб вафот этди.
Хабар қилинишича, жума куни 50 ёшли Суриндер Коли шимолий Уттаракханд штатидаги Харидвар шаҳрида ўзи юритадиган чойхона ичида осилган ҳолда топилган.
У 2025 йилда Ҳиндистон олий суди уни Деҳли чеккасидаги Нитари қишлоғида 2006 йилда содир этилган аёллар ва болалар қотиллигига алоқадор сўнгги иш бўйича оқлаганидан кейин озодликка чиққан эди.
Хабарларга кўра, унинг жасади топилган ва тергов ҳаракатлари бошланган.
2006 йилги воқеа бир уй яқинидан 19 нафар аёл ва боланинг жасад қолдиқлари топилганидан кейин Ҳиндистонни ларзага солган эди.
Бу иш ошкор бўлганда, у бутун мамлакат бўйлаб ғазабга сабаб бўлди ва полиция фарзандлари ғойиб бўлган оилаларнинг шикоятларига эътибор бермаганми деган саволларни келтириб чиқарди.
Коли ва унинг иш берувчиси, тадбиркор Мониндер Сингх Пандхер 2006 йилда Пандхернинг Нитаридаги уйи яқинидан тана аъзолари топилганидан кейин ҳибсга олинган эди. Полиция қотилликлар Коли хизматкор бўлиб ишлаган ўша уйда содир бўлганини маълум қилган.
Қурбонларнинг аксарияти камбағал муҳожир оилалардан бўлган, эркаклар яшаган уй эса маҳалланинг анча бой қисмида жойлашган эди.
Ҳиндистоннинг бош тергов органи — Марказий тергов бюроси (CBI) икки эркакка нисбатан 19 та жиноят иши қўзғатган. Коли қотиллик, одам ўғирлаш, зўрлаш ва далилларни йўқ қилишда айбланган, Пандхер эса ахлоқсиз мақсадларда одам савдоси билан шуғулланишда айбланган.
2023 йилда Аллаҳобод Олий суди Колини 12 та иш бўйича оқлади. Пандхер ҳам ўша йили иккита иш бўйича оқланиб, озодликка чиқарилди.
Ўтган йилнинг ноябрь ойида Олий суд Колини сўнгги иш бўйича оқлаб, унинг айбини бўйнига олиши — жумладан, каннибализм ва некрофилия ҳақидаги даъволари — қийноқлар остида олинганини маълум қилди. У 19 йиллик қамоқдан кейин озодликка чиқарилди.
Озодликка чиққанидан сўнг, Коли Харидвар шаҳрига кўчиб ўтган ва у ерда сўнгги бир неча ой давомида ижарага олинган чойхонани бошқариб келаётган эди.