Ҳиндистонда тўсиқ билан ёпилган норозилик майдонига кирган «сувараклар» этакчилари ҳибсга олинди
Дели марказида намойишчилар сайлов комиссияси раҳбарининг сайловчиларнинг янгиланган рўйхатлари сабабли истеъфога чиқишини талаб қилиб, тосиқлардан ошиб ўтишди.
Ҳиндистонда «Сувараклар» партияси етакчилари тўсиб қўйилган норозилик майдонига кирганидан кейин ҳибсга олинди
Ҳиндистоннинг «Cockroach Janta Party» (CJP — «Сувараклар халқ партияси») етакчилари сешанба куни эрталаб қаттиқ қўриқланадиган норозилик майдонига кириб, сайловчилар рўйхатининг баҳсли қайта кўриб чиқилиши ортидан мамлакат сайлов комиссияси раҳбарининг истеъфосини талаб қилиб ҳайқирганидан сўнг ҳибсга олинди.
Партия асосчиси Абхижит Дипке полиция томонидан Делидаги машҳур норозилик ўтказиш жойи бўлган тарихий обсерватория — Жантар Мантардан Ашутош Ранка ва Саурав Дас олиб кетилаётгани акс этган видеони жойлаштирди.
Кадрларда бу икки эркак бошқалар билан биргаликда полиция тўсиқларидан ошиб ўтгани, сўнгра Ҳиндистон байроғини тутган ҳолда шиорлар айтгани кўринади.
Бош вазир Нарендра Модининг рақиблари сайловчилар рўйхатининг қайта кўриб чиқилиши унинг партиясига ёрдам беради, деб таъкидламоқда, бу даъво ҳам партия, ҳам Сайлов комиссияси томонидан рад этилган.
Норозилик намойишлари бир неча кундан бери давом этмоқда, намойишчилар Бош сайлов комиссари Гянеш Кумарнинг истеъфосини талаб қилмоқда.
Намойишчилар акциялар ўтказилиши мумкин бўлган жойларга қўйилган чекловларга қарши чиқаётгани сабабли полиция цешанба куни бутун Дели бўйлаб хавфсизлик чораларини кучайтирди.
Сешанба куни эрталаб Дипке, Дас ва Ранкаларнинг барчаси Дас ва Ранканинг Жантар Мантарга кираётгани акс этган видеоларни улашди.
«Сиз қаршиликни бекор қила олмайсиз», деб ёзди Дипке X платформасида.
Дас ҳам бу жой «қайтариб олингани» ва улар ҳибсга олинаётгани ҳақида хабар жойлаштирди.
Полиция етакчиларни қаерга олиб кетгани дарҳол аниқ бўлмади.
Кейинроқ Ранка бошқа ҳибсга олинганлар билан бирга полиция автобусидан Instagram'да тўғридан-тўғри эфирга чиқди, у ерда улар хушнуд кўринди ва чекинмасликларини айтишди.
Ҳибсга олишлар Федерал Ички ишлар вазирлиги Делида узоқ вақтдан бери оммавий норозиликлар билан боғлаб келинган Жантар Мантар энди норозилик билдириш учун белгиланган жой бўлмаслигини эълон қилганидан бир кун ўтиб юз берди. Бунинг ўрнига расмийлар рухсатнома билан намойишлар ўтказиш мумкин бўлган учта муқобил жойни айтиб ўтди.
Бу қарордан олдин CJP Жантар Мантарда тинч норозилик намойиши ўтказишга рухсат сўраб Дели полицияси мутасаддилари билан учрашган ва агар жавоб олмаса, кейинги намойишларни эълон қилиши ҳақида огоҳлантирган эди.
«Дели полициясига Жантар Мантарга қачон боришимиз мумкинлиги ҳақида сана сўраб мурожаат қилганимиздан 30 дақиқа ўтгач, Жантар Мантар норозилик майдони мақомидан маҳрум қилинди», деб ёзган эди аввалроқ Ранка X’да.
Партия раҳбариятининг аксарият қисми охирги кунларда Делида бўлиб турган эди. Бироқ, Дипке бувисининг вафотидан сўнг Махараштрадаги она шаҳрига жўнаб кетган эди. У шанба кунига режалаштирилган намойиш олдидан ҳибсга олинган ва эртаси куни қўйиб юборилган бир неча CJP етакчилари орасида эди.
CJP шанба куни Жантар Мантарда норозилик намойиши ўтказишга чақирган эди, аммо расмийлар намойишчиларнинг ушбу жойга етиб боришига йўл қўймаслик учун пойтахт бўйлаб кенг кўламли хавфсизлик чекловларини жорий этди.
Бир нечта метро бекатлари ёпилди, поездлар қатнови издан чиқди ҳамда минглаб полиция ва ҳарбийлаштирилган кучлар ходимлари сафарбар қилинди.
Дам олиш кунларида полиция минглаб одамларни, жумладан бир қанча журналистларни ҳибсга олди ва кейинчалик қўйиб юборди. Норозилик акциясидан олинган баъзи видео ва фотосуратларда полиция одамларни, жумладан аёлларни куч билан судраб, автобусларга билан итариб юбораётгани кўринади.
Алоҳида равишда, мухолифат партиялари душанба куни Делида пойтахт марказидаги йирик харид қилиш ҳудуди бўлган Коннот Плейсдан Олий судгача юриш ўтказдилар.
Ҳиндистоннинг асосий мухолифат партияси бўлган Конгресс ҳам душанба куни Олий судга мурожаат қилиб, Сайлов комиссиясининг сайловчилар рўйхатини қайта кўриб чиқиш тадбирига эътироз билдирди, бунинг оқибатида ўн миллионлаб исм-шарифлар сайловчилар рўйхатидан чиқариб ташланган.
Манқидчиларнинг таъкидлашича, бу тадбир овоз бериш ҳуқуқига эга бўлган сайловчиларни четлаштириши ва уларнинг ўз ҳуқуқларини исботлашларини қийинлаштириши мумкин.
«The Indian Express» нашри Кумар сайловчиларни рўйхатга олишдаги ўзгаришлар бўйича бошқа икки сайлов комиссари томонидан билдирилган хавотирларни эътиборсиз қолдиргани ҳақида хабар берганидан кейин қайта кўриб чиқиш тадбирига нисбатан ғазаб янада ортди. Сайлов комиссияси эса ўз қарорлари бир овоздан қабул қилинганини маълум қилди.
Ҳозирги намойишлар тўлқини шу йил бошида имтиҳонлардаги қонунбузарликлар бўйича талабалар бошчилигида ўтказилган норозилик намойишларининг давомидир. CJP июль ойида федерал таълим вазири Дхармендра Прадханнинг истеъфоси билан якунланган ўша намойишларда муҳим рол ўйнаган эди.