Ҳайвонларни ҳимоя қилувчилар боланинг кўз ўнгида итни қийнаган Чирчиқлик фуқарога берилган енгил жарима устидан шикоят қилмоқчи. Видео

Ҳайвонларни ҳимоя қилиш фаоллари Чирчиқда боланинг кўз ўнгида итни қийнаган эркакка берилган енгил жарима устидан шикоят қилмоқчи. Видео

Чирчиқда бир эркак итга нисбатан шафқатсиз муносабатда бўлгани учун жавобгарликка тортилди ва унга 3,08 миллион сўм миқдорида жарима белгиланди. Ҳайвонларни ҳимоя қилиш фаоллари ва депутатлар бу жазони жуда енгил деб ҳисоблашмоқда ва унинг устидан шикоят қилишмоқчи, чунки қийноқлар вояга етмаган бола иштирокида содир бўлган.

Воқеа 23 август куни юз берган. «Mehr va Oqibat» ҳайвонларни ҳимоя қилиш жамиятининг колл-марказига маҳаллий аҳоли вакили мурожаат қилган, кўп ўтмай ижтимоий тармоқларда воқеа акс этган видео пайдо бўлган. Видеода эркак киши скамейка тагида тинчгина ётган итнинг олдига келгани кўринади. У ҳайвонни тўсатдан ушлаб, силтаб, ҳавога кўтаради, сўнгра қўллари билан унинг жағини сиқиб, қайиради. Эркакнинг ўзи ит уни тишлаб олганини даъво қилган, бироқ гувоҳларнинг хабар беришича, ҳайвон ҳеч кимга халақит бермаган ва тажовузкорлик кўрсатмаган.

«Mehr va Oqibat» вакили воқеа жойига бориб, гувоҳларни сўроқ қилган ва ҳуқуқ-тартибот идораларига ариза ёзишда ёрдам берган. Кейинроқ ҳайвонлар ҳимоячиси Илона Расулова жабрланган итни тутиб олган — ҳозирда у хавфсиз жойда.

11 сентябрь куни профилактика инспектори эркакка нисбатан Маъмурий жавобгарлик тўғрисидаги кодекснинг 111-моддаси 1-қисми («Ҳайвонларга нисбатан шафқатсиз муносабатда бўлиш») бўйича энг кам жарима белгилади. «Mehr va Oqibat» бу қарорга қатъиян рози бўлмади. Ҳайвонларни ҳимоя қилиш фаоллари ишни ушбу модданинг 2-қисмига («Ҳуқуқбузарликни вояга етмаган шахс иштирокида содир этиш») қайта таснифлашни талаб қилмоқда. Ушбу қисм 6,6 миллиондан 11,3 миллион сўмгача бўлган миқдорда кўпайтирилган жаримани ёки 15 суткагача маъмурий қамоқни назарда тутади.

Жазони кучайтириш талабига депутат Елена Бабенко ҳам қўшилди.

«Энг даҳшатлиси — у буни боланинг кўз ўнгида қилган. Бола катта эркакнинг ожиз ҳайвонни қийнаётганини кўрган. Қарор устидан албатта шикоят қилиш керак, чунки болалар ёвузлик жазоланишини кўришлари лозим», — дея таъкидлади у.