Гулдасталар ўрнига — хайрия. Тошкент мактаблари ўқув йили бошланиши анъанасини қандай ўзгартирмоқда
Тошкентдаги бир қатор хусусий мактабларда янги ўқув йилида гулдасталар совға қилиш анъанасидан хайрия фойдасига воз кечилди. Leader School бир неча йилдан буён хосписга кўчатлар топшириб келмоқда. Sehriyo, Oxbridge ва Vosiq International бу йил онкологик касалликка чалинган болалар учун маблағ йиғди. Бундай ташаббуслар нимаси билан муҳим?
Гулдасталар ўрнига — хайрия: Тошкент мактаблари ўқув йили бошланиши анъанасини қандай ўзгартирмоқда
Мактабларда ўқув йилининг бошланиши азалдан педагогларга гулдасталар тақдим этиш билан бирга кечган. Бу ўқитувчиларга бўлган эътибор ва ҳурматни ифодаловчи гўзал анъана бўлса-да, айрим мактаблар ундан аста-секин воз кечмоқда. Тошкентдаги бир қатор хусусий мактабларда ота-оналар ва ўқувчиларга бир неча кундан кейин сўлиб қоладиган гулларни сотиб олиш ўрнига, хайрия акцияларида иштирок этиш таклиф қилинмоқда.
Leader School мактабида бир неча йилдан буён шаҳарда, сўнгги йилларда эса Taskin болалар хосписи ҳудудида экиш учун кўчатлар йиғилмоқда. Sehriyo, Oxbridge School ва Vosiq International School мактабларида эса бу йил онкологик касалликларга чалинган болаларга ёрдам бериш учун «Ezgu Amal» жамоат фондига маблағ йиғилди. «Газета» ўқувчиларга ўқув йилини эзгу ишлар билан бошлашга ёрдам берган акциялар ҳақида ҳикоя қилади.
Мана олти йилдирки, Leader School хусусий мактабида ўқув йили «Сўнмас яхшилик» акцияси билан бошланади. Ўқитувчилар учун гулдасталар ўрнига ота-оналар ва ўқувчилар кўчатлар — ёш дарахтлар, буталар ва гуллайдиган ўсимликлар сотиб олишади, кейинчалик улар Тошкентнинг турли туманларига экилади.
«Кўчат — бу шунчаки ўсимлик эмас, балки янги ҳаёт, умид ва келажак рамзидир. Акциямизнинг асосий мақсади — „ёрдам“, „ғамхўрлик“ ва „ҳамдардлик“ сўзлари ҳақиқий маъно билан тўлган ва амалий ишлар билан тасдиқланадиган бефарқ бўлмаган одамлар жамиятини шакллантиришдир», — деди мактаб асосчиси ва директори Фируза Ваҳабова «Газета»га.
Ўтган йилларда ёш дарахт ва буталар мактаб ҳомий сифатида қўллаб-қувватлаб келаётган Taskin болалар хосписи ҳудудига экилган эди. Йил давомида ўқувчилар ва педагоглар кичкина беморлар ҳузурига боришади, совғалар олиб келишади, ижодий машғулотлар ва маҳорат дарслари ўтказишади.
Бу йил Leader School яқинда очилиши кутилаётган катталар хосписи ҳудудини кўкаламзорлаштиришда иштирок этди. Акцияда юқори синфларнинг 25 нафар ўқувчиси қатнашди. Улар Сурия гибискуси, тимьян, павловния, катальпа, игнабаргли дарахтлар, шунингдек, олма, нок, гилос, хурмо ва бошқа мевали дарахтлар кўчатларини олиб келиб, экишди.
«Биз учун бу шунчаки экологик акция эмас, балки ўсмирларни натижасини ўз кўзлари билан кўра оладиган ҳақиқий ижтимоий фойдали ишга жалб қилиш имкониятидир. Экилган дарахтлар нафақат ҳудудни ободонлаштиришга қўшилган ҳисса, балки эътибор, қўллаб-қувватлаш ва инсоний ғамхўрлик рамзи бўлишини истаймиз», — деб таъкидлади Фируза Ваҳабова.
Мактаб кўчатларнинг қандай илдиз отиши ва ўсишини кузатиб боришни ва зарур бўлганда уларни парвариш қилишда иштирок этишни режалаштирмоқда.
«Сўнмас яхшилик» акцияси мактабнинг ўқувчилар, педагоглар ва ота-оналар жалб этилган кенгроқ хайрия ва ижтимоий фаолиятининг бир қисмидир, деди директор.
«Бола учун катталар таклиф қилган фаолиятда шунчаки иштирок этиш эмас, балки буни нима учун ва нима сабабдан қилаётганини, унинг қилган иши кимга фойда келтиришини ва ўзидан кейин қандай из қолдиришини тушуниши муҳим.
Биз учун педагогика — бу маънолар педагогикасидир: гўзал тадбир ташкил этиш эмас, балки болаларга масъулият, ғамхўрлик ва дахлдорлик тажрибасини яшаб ўтишга ёрдам беришдир. Токи яхшилик мавҳум сўз бўлиб қолмай, бола маъносини тушунадиган аниқ ҳаракатга айлансин», — дея таъкидлади у.
Sehriyo мактаби бу йил Тошкентда илк бор «Ezgu Amal» жамоат фонди томонидан ўтказилган «Болалар гуллар ўрнига» акциясини қўллаб-қувватлади. Бу ташаббус Россияда 13 йил аввал пайдо бўлган ва ўшандан бери МДҲнинг бошқа мамлакатлари ҳудудида ҳам ўтказиб келинмоқда. Унинг моҳияти шундаки, синф ўқитувчига барча ўқувчилар номидан битта умумий гулдаста совға қилади, алоҳида гулдасталарга сарфланиши мумкин бўлган пуллар эса хайрияга йўналтирилади.
«Ушбу акция фалсафаси бизга жуда яқин. Гуллар, шубҳасиз, гўзал, аммо бир ҳафтадан кейин улар сўлиб қолади, болага кўрсатилган ёрдам эса узоқ муддатли ва ҳақиқий фойда келтириши мумкин. Биз Тошкентда ҳам шундай ташаббусни йўлга қўйиш ажойиб бўларди, деб ўйладик», — деди «Ezgu Amal» фонди педагоги ва психологи Камилла Тўрахўжаева.
Унинг сўзларига кўра, ўқув йилининг бошланиши болалар билан меҳрибонлик, ўзаро ёрдам ва ҳамдардлик ҳақида гаплашиш, қадриятларнинг муҳимлигини реал ишлар билан тасдиқлаш учун қулай фурсатдир.
«Болага шунчаки меҳрибон бўлиш кераклигини ёки бошқаларга ёрдам бериш муҳимлигини эшитишнинг ўзи кифоя қилмайди. У ўз қилган ишининг натижасини кўриб: „Мен ҳақиқатан ҳам кимгадир ёрдам бердим“, деб тушунганида бу анча кучлироқ таъсир қилади. Ўшанда хайрия узоқ ва мавҳум нарса бўлишдан тўхтайди, болалар эса ҳатто уларнинг кичик қилган ишлари ҳам аҳамиятга эга эканлигини тушуна бошлайдилар», — деди психолог.
Тўрахўжаева ижтимоий тармоқларда акция ҳақида гапириб, таълим муассасаларини унга қўшилишга таклиф қилди. Бу чақириққа Oxbridge хусусий мактабининг иккита филиали, Vosiq International School ва Sehriyo мактаблари жавоб беришди, у ерда 23 та синф акцияни қўллаб-қувватлашга қарор қилди.
«Биз болаларда ўзаро ёрдам, ғамхўрлик ва иштирок этиш маданиятини тарбиялашни муҳим деб ҳисоблаймиз. Шунинг учун ушбу акцияга қўшилиш биз учун табиий ҳол эди. Бу ғоя бутун мактабда илиқ кутиб олинди: ўқитувчилар ташаббусни қўллаб-қувватладилар, ота-оналар маблағ йиғишга тайёрлик билан қўшилдилар, ўқувчилар эса унда фаол иштирок этдилар», — дея таъкидлашди Sehriyo маъмуриятида.
Ташаббусга бир нечта гул дўконлари ҳам қўшилди: баъзилари акция иштирокчиларига чегирмалар таклиф қилишди, бошқалари эса гулдасталар сотишдан тушган маблағнинг бир қисмини фондга ўтказишни таклиф қилишди. Хайрия маблағлари фонд сайтидаги QR-код ва Oxbridge ҳамда Sehriyo мактабларида ўрнатилган хайрия қутилари орқали қабул қилинди.
Хайрия маблағлари «Ezgu Amal» фонди васийлигидаги онкологик ва гематологик касалликларга чалинган болаларга ёрдам беришга — қимматбаҳо дори-дармонларни сотиб олиш, текширувлар ёки даволаниш билан боғлиқ бошқа харажатларга йўналтирилади.