Гренландия парламенти Трамп билан эришилган хавфсизлик бўйича келишувни ратификация қилди

Гренландия парламенти Трамп билан тузилган хавфсизлик келишувини тасдиқлади

3-ноябр куни Гренландия парламенти Арктика оролининг шу йил бошида АҚШ президенти Доналд Трамп билан имзоланган хавфсизлик бўйича келишувини ратификация қилди. Бироқ мухолифат партиясининг айрим аъзолари келишувнинг иқтисодий фойдасига шубҳа билдирди, деб хабар бермоқда Реутерс.

АҚШ, Дания ва Гренландия ушбу келишувни сентабрда имзолаганди. У Трампнинг муҳим ва фойдали қазилмаларга бой бу оролни эгаллаб олиш ҳақидаги таҳдидларидан кейин юзага келган кескинликни юмшатишга қаратилган.

Келишув АҚШ ҳарбийларининг Гренландиядаги ролини кенгайтиради — иккита янги ҳарбий база ва Трампнинг “Олтин гумбаз” ракетага қарши мудофаа тизими учун йўл очади, шу билан бирга Дания суверенитети ва гренландияликларнинг ўз тақдирини ўзи белгилаш ҳуқуқини яна бир бор тасдиқлайди.

Ўтган ойдаги дастлабки муҳокамаларда қонун чиқарувчиларнинг аксарияти ушбу келишувни қўллаб-қувватлашини билдирганди. 3-ноябрдаги овоз беришда 16 нафар депутат келишувни ёқлаб овоз берди, қаршилар бўлмади, 7 нафари бетараф қолди.

Оқ уй январда Трамп Гренландияни қўлга киритиш вариантларини, жумладан, АҚШ ҳарбий кучларидан эҳтимолий фойдаланишни муҳокама қилаётганини билдирганди. Бу Европа ҳукуматларида хавотир уйғотиб, вазиятни юмшатиш бўйича шиддатли дипломатик саъй-ҳаракатларга сабаб бўлган. Гренландия ташқи ишлар вазири Мюте Эгеде келишувнинг ратификация қилиниши орол учун муҳим қадам эканини айтди.

“Тинчлик ва барқарорлик эндиликда ўз-ўзидан кафолатланган нарса эмаслигини тан олишимиз керак”, — деди Эгеде овоз беришдан олдин Нуукдаги депутатларга.

Гренландияда энг фаол сиёсий овоз бўлмиш мухолифатдаги Налерақ партияси муҳокама чоғида келишувнинг иқтисодий аҳамиятини шубҳа остига қўйди.

“Биз мустақил давлат бўлганимизда манфаат кўришимиз мумкин бўлган яхшироқ келишувни хоҳлаймиз. Аммо ушбу келишувдан ҳеч қандай иқтисодий фойда олинмади”, — деди Налерақ раиси Пеле Броберг.

Дания парламенти қонун лойиҳасини 11-ноябрда биринчи ўқишда, 19-ноябрда эса иккинчи ўқишда кўриб чиқиши ва овозга қўйиши режалаштирилган.

Ижроия келишуви Дания ва Гренландия уни ратификация қилгач кучга киради ҳамда АҚШ Сенатининг тасдиғини талаб қилмайди.