Google Play Store комиссиялари туфайли бир миллиард фунт стерлингдан кўпроқ маблағ йўқотиши мумкин

Google Play Store комиссиялари сабабли бир миллиард фунт стерлингдан кўпроқ маблағидан маҳрум бўлиши мумкин

Буюк Британияда Google компаниясига қарши Play Store иловалар дўкони орқали фойдаланувчилар ва дастурчилардан ундирган комиссиялари сабабли бир миллиард фунт стерлингдан ортиқ суммага жамоавий даъво аризаси топширилди. Тахминан 20 миллион истеъмолчи номидан берилган даъвони кўриб чиқиш Лондонда бошланди.

Ишни Рақобат масалалари бўйича апелляция трибунали кўриб чиқмоқда. Даъвогарларнинг таъкидлашича, Google бозордаги устун мавқеидан фойдаланиб, иловаларни сотиб олиш, ўйин ичидаги тўловлар ва обуналар учун 30 фоизгача комиссия ундирган. Уларнинг талқинига кўра, дастурчилар ушбу харажатларни фойдаланувчилар зиммасига юклашган.

Даъвога истеъмолчилар ҳуқуқлари ҳимоячиси Лиз Колл бошчилик қилмоқда. Унинг вакиллари, шунингдек, Google харид бошқа платформалар орқали амалга оширилган ҳолларда ҳам комиссия қўллаганини даъво қилмоқдалар. Мисол тариқасида улар YouTube Premium обунасини келтиришмоқда, даъвогарларнинг фикрига кўра, у App Store орқали сотилганда, компания Apple комиссиясини истеъмолчи учун белгиланган нархга қўшиб юборган.

Google ва унинг бош компанияси Alphabet айбловларни рад этмоқда. Компания даъвода Android тақдим этадиган танлов имкониятлари ҳисобга олинмаганини, Google комиссиялари эса бозордаги энг паст кўрсаткичлардан бири эканини маълум қилди.

Google юристлари, шунингдек, Play Store ҳам дастурчилар, ҳам фойдаланувчилар томонидан жиддий рақобатга дуч келаётганини, жумладан, App Store ва бошқа платформалар билан рақобатлашаётганини таъкидламоқдалар.

Ушбу суд жараёни рақамли дўконлардаги комиссиялар туфайли йирик технологик компанияларга қарши Буюк Британиядаги навбатдаги иш бўлди. Шу каби даъволар Apple ва Sony компанияларига нисбатан ҳам кўриб чиқилган бўлиб, улар ҳам 30 фоизгача комиссия ундиришда айбланган эди.

Шу ёзда аввалроқ Google Европадаги бошқа бир антимонопол низода ютқазган эди: ИА суди Android тизимининг ишлашида рақобат қоидаларини бузгани учун компанияга қўйилган 4,1 миллиард евролик жаримани узил-кесил тасдиқлади.