Германияда полиция Ҳеллоуин ширинликларидан игна топилгани ҳақида 80 дан ортиқ хабар олди
Камида икки нафар бола оғиз бўшлиғидан жароҳат олгани маълум қилинди. Расмийлар буни ТикТокъдаги челленж ёки интернетдаги чақириқлар билан боғламоқда.
Германияда полиция Ҳеллоуин ширинликлари орасидан игна топилгани ҳақида 80 дан ортиқ мурожаат қабул қилди
Германияда полицияга болалар Ҳеллоуин байрамида йиғиб олган ширинликлар ичида игна ва бошқа ўткир буюмлар борлиги юзасидан 80 дан ортиқ хабар келиб тушди. Натижада камида икки нафар бола жароҳат олди.
Маълум бўлишича, Бремерфёрде шаҳрида бир қизча таркибида камида беш сантиметрли тўғноғич бўлган шоколадни тишлаб, тилини шикастлаган. Мекленбург шаҳрида эса бир бола ширинлик ичидаги игна сабаб оғиз бўшлиғидан енгил жароҳат олган.
Бундай ҳолатларнинг энг кўпи, 25 та ҳолат, Баварияда қайд этилган. Терговчиларнинг тахминига кўра, айрим жиноятчилар интернетдаги чақириқлардан илҳомланган бўлиши мумкин.
Эссен полицияси вакили Маттиас Верк Билд нашрига ҳуқуқ-тартибот ходимлари бундай ғоялар тарқалган манбани излаётганини айтди. Қуйи Бавария полицияси ҳам бу воқеаларнинг ТикТокъдаги челленж билан боғлиқлигини текширмоқда.
11-ноябр куни нишонланадиган Муқаддас Мартин куни арафасида болалар Германиянинг айрим ҳудудларида яна хонадонма-хонадон юриб, ширинликлар йиғади. Шу сабабли полиция ота-оналарга барча ширинликларни текшириб кўришни тавсия қилмоқда.