Германияда 13 ёшга тўлмаган болаларга ижтимоий тармоқлардан фойдаланишни тақиқлаш режалаштирилмоқда
Ҳукумат, шунингдек, платформаларга дастлабки босқичданоқ болалар хавфсизлигини ҳисобга олиш мажбуриятини юкламоқчи.
Германияда 13 ёшга тўлмаган болаларга ижтимоий тармоқлардан фойдаланишни тақиқлаш режалаштирилмоқда
Германия ҳукумати интернетда болаларни ҳимоя қилиш чораларини янада кучайтиришни режалаштирмоқда. Таклифлар орасида 13 ёшга тўлмаган болаларга ижтимоий тармоқлардан фойдаланишни тақиқлаш, ўсмирлар учун чекловлар жорий этиш ҳамда бошланғич синф ўқувчилари учун сунъий интеллект бўйича махсус таълим дастурини ишлаб чиқиш бор. Вазирлар маҳкамаси ислоҳотнинг асосий қоидаларини маъқуллаган, бироқ якуний қонунлар ҳали қабул қилинмаган.
Германия Европа Иттифоқи даражасида ягона қоидалар жорий этилгунига қадар ўз чекловларини белгилашни кўзламоқда. Бунда болалар учун мўлжалланган махсус платформаларга истисно тариқасида рухсат берилиши мумкин. 13 ёшдан 18 ёшгача бўлган ўсмирлар учун босқичма-босқич чекловлар назарда тутилмоқда, аммо улар ҳозирча аниқ белгиланмаган.
Ҳукумат, шунингдек, платформаларга бошидан бошлаб болалар хавфсизлигини инобатга олиш мажбуриятини юкламоқчи. Жумладан, алгоритмлар асосидаги тавсияларни стандарт ҳолатда ўчириб қўйиш ва қарамлик келтириб чиқарувчи функсияларга қарши курашиш таклиф этилмоқда. Бундай функсиялар қаторига лентани чексиз айлантириш ва видеоларни автоматик равишда ижро этиш киради.
Яна бир ташаббус «СИ-Сеепфердчен» дастури бўлиб, унда бошланғич синф ўқувчиларига сунъий интеллект иловаларини таниш, уларнинг имкониятлари ва хавф-хатарларини англаш ҳамда улардан онгли равишда фойдаланиш ўргатилади.
Чекловлар қачон кучга кириши номаълум. Битком сўрови маълумотларига кўра, Германия аҳолисининг 79 фоизи болалар учун «СИ-Сеепфердчен» дастури ғоясини фойдали деб ҳисоблайди.