Германияда 105 ёшли шахс нацистларнинг ҳарбий асирлар лагерида содир этилган жиноятлар бўйича тергов қилинмоқда
Гумонланувчи ўн минглаб совет ҳарбий асирлари ҳалок бўлган «Шталаг 326» (Stalag 326) лагеридаги қотилликларга шерик бўлганликда айбланмоқда.
Германияда 105 ёшли шахс нацистларнинг ҳарбий асирлар лагерида содир этилган жиноятлар бўйича тергов қилинмоқда
Зеннедаги «Сталаг 326» лагерида ўттиз минг рус ҳарбий асири дафн этилган
Германия прокуратураси Иккинчи жаҳон уруши даврида нацистларнинг ҳарбий асирлар лагерида кўплаб қотилликларга шерик бўлганликда айбланаётган 105 ёшли эркакка нисбатан тергов олиб бормоқда.
У Германия шимоли-ғарбидаги Зенне шаҳрида жойлашган «Сталаг 326 VI K» лагерида соқчи бўлиб хизмат қилганликда гумон қилинмоқда.
Дортмунд прокурори Соня Фродерманн ўз баёнотида Зеннедаги яна бир собиқ лагерь соқчисига нисбатан ҳам шунга ўхшаш иш олиб борилганини маълум қилди.
Унинг сўзларига кўра, ушбу гумонланувчи бир неча ой аввал 99 ёшида вафот этган.
Икки собиқ соқчи ҳақида қўшимча тафсилотлар ошкор этилмаган, бироқ бу ҳолатлар прокурорлар нацистлар давридаги жиноятларни тергов қилишда дуч келаётган қийинчиликларни кўрсатади, чунки қолган гумонланувчиларнинг аксарияти аллақачон вафот этган.
Иккинчи жаҳон уруши даврида Совет Қизил армиясининг 5,3 миллиондан ортиқ аскари Германияда асирликда ушлаб турилган ва уларнинг ярми ҳалок бўлган деб ишонилади. Омон қолганларнинг кўпчилиги ватанига қайтганидан кейин хоин сифатида қабул қилинган.
Зеннедаги ҳарбий асирлар лагери ёки «Сталаг» энг йирикларидан бири бўлган.
Ёдгорлик мажмуаси маълумотларига кўра, 1941 ва 1945 йиллар оралиғида нацистлар Германиясига олиб келинган ҳар уч совет ҳарбий асиридан бири Зенне мажмуаси орқали ўтган ва улар кўпинча кенг минтақада мажбурий меҳнатга жалб қилинган.
«Сталаг»даги шароитлар даҳшатли бўлиб, асирлар ваҳшиёна муносабат ва тўйиб овқатланмасликдан азият чеккан.
У ерда рўйхатга олинган 180 000–200 000 совет ҳарбий асирларидан кўпчилиги ҳалок бўлган ва ўн минглаб одамлар шу ерда дафн этилган. Зеннеда Франция, Польша, Сербия ва Бельгиядан бўлган ҳарбий асирлар ҳам сақланган.
1945 йилда лагерь озод қилинганда 9 000 дан ортиқ рус ҳарбий асири тирик бўлган.
Прокурорнинг таъкидлашича, 105 ёшли шахсга нисбатан тергов ҳали ҳам давом этмоқда ва кўплаб қотилликларга шериклик айблови унинг «Сталаг 326»даги фаолияти билан боғлиқ.
Германияда 1979 йилдан бери қотиллик ёки қотилликка шериклик жиноятлари учун даъво муддати мавжуд эмас, бу эса нацистлар давридаги жиноятларни таъқиб қилиш имконини беради.
«Хемер Сталаг VI A» лагерининг яна бир юз ёшли соқчиси ҳам тергов қилинаётгани айтилмоқда.
Шунга қарамай, урушдан 80 йилдан кўпроқ вақт ўтгач, жиноятчиларни жавобгарликка тортиш ниҳоятда қийинлашган.
Тўрт йил аввал Заксенхаузен концлагерининг 101 ёшли соқчиси қотилликка шериклик учун беш йиллик қамоқ жазосига ҳукм қилинган эди. Йозеф Шюц судланган энг кекса нацист жиноятчиси бўлди.
У қамоқ жазосини ўтамади ва 2023 йилда ҳукм устидан апелляция бериш жараёнида вафот этди.
Нацистлар концлагерининг собиқ котибаси 2022 йилда қотилликка шерикликда айбдор деб топилиб, шартли қамоқ жазосига ҳукм қилинган эди. У ўтган йили 99 ёшида вафот этди.
Нацистлар жиноятларини таъқиб қилиш ғарбдаги Дортмунд шаҳри прокуратураси томонидан амалга оширилса-да, ишлар дастлаб жануби-ғарбдаги Людвигсбург шаҳрида жойлашган Нацистлар жиноятларини тергов қилиш марказий идораси томонидан кўриб чиқилади.