Германия Лейпсигдаги дронлар учун Россияни айблади, Лавров жавоб қайтарди
Россия ташқи ишлар вазири Сергей Лавров Германиянинг Лейпсиг аеропортидаги дронлар билан боғлиқ диверсияга уриниш бўйича Москвага нисбатан кўрган чораларини «ҳақиқий урушнинг бошланиши» деб баҳолади. Германия расмийлари эса Россиянинг эҳтимолий жавобгарлиги ҳақидаги хулоса учувчисиз аппаратлар созламалари ва улардаги айрим компонентларни ўрганиш асосида чиқарилганини билдирмоқда.
Германия Лейпсигдаги дрон ҳодисаси учун Россияни айблади, Лавров бунга жавоб берди
Россия ташқи ишлар вазири Сергей Лавров Германиянинг Лейпсиг аеропортида дронлар ёрдамида амалга оширилган эҳтимолий диверсияга жавобан кўрган чораларини кескин танқид қилди.
Лавров 6-сентабр куни «Вести» дастуридаги чиқишида Германия томонининг ҳаракатларини «умуман олганда, ҳақиқий урушнинг бошланиши» деб атаган.
Россия ТИВ раҳбари Германия Россиянинг Бонндаги бош консулхонасини чиқариб юборгани, тегишли келишувни бекор қилгани ва Берлиндаги «Рус уйи»ни ёпаётганини айтган.
Лавров, шунингдек, Берлин ҳодисани етарлича текширмасдан туриб, унда Россияни айблаганини даъво қилди.
Лейпсиг аеропортидаги ҳодиса 4-август куни содир бўлган. Германия томони уни Украинага тегишли Ан-124 юк самолётига қарши диверсияга уриниш сифатида текширмоқда.
Берлин воқеа тафсилотларини ўрганиш ва унга нисбатан жавоб чораларини тайёрлаш учун қарийб бир ой вақт сарфлаган.
Германия ички ишлар вазири Александр Добриндтнинг билдиришича, Россиянинг эҳтимолий жавобгарлиги ҳақидаги хулоса учувчисиз аппаратларнинг созламалари ва айрим техник компонентларини ўрганиш натижасида чиқарилган.
Унинг айтишича, ушбу компонентлар аввалги бошқа гибрид ҳодисаларда ҳам қўлланган.
Бундестагдаги Христиан-демократик ва Христиан-социал иттифоқи (ХДИ/ХСИ) фраксиясининг ташқи сиёсат бўйича эксперти Юрген Хардт эса Германия жамоатчиликка барча далилларни тақдим этиши шарт эмаслигини билдирган.
Унинг фикрича, айбланаётган томон ҳамкорлик қилишдан бош тортган шароитда Россиянинг жавобгарлигига нисбатан «оқилона шубҳа қолдирмайдиган ишончли фактлар занжири» етарли бўлиши мумкин.
Немис оммавий ахборот воситалари аввалроқ тергов органлари маълумотларига таяниб, Лейпсиг аеропортидаги эҳтимолий диверсияда бир нечта дрон иштирок этгани ҳақида хабар берган эди.
Маълумотларга кўра, портловчи модда ўрнатилган дронлардан бири Украина юк самолётлари турган жой яқинидан топилган.