Германия Лейпсигдаги дрон ҳодисасини «гибрид таҳдид» деб баҳолади
Германия ҳукумати Лейпсиг-Галле аеропортида украин юк самолёти яқинидан портловчи модда ўрнатилган дрон топилишига Россия алоқадор эканини тасдиқлаш учун ҳозирча етарли далиллар йўқлигини билдирди. АҚШ разведкаси эса учувчисиз аппарат Россия ҳукумати билан боғлиқ бўлиши мумкин, деб ҳисобламоқда.
Германия Лейпсигдаги дрон ҳодисасини "гибрид таҳдид" деб баҳолади. Германия ички ишлар вазири Александер Добриндтнинг 19-август куни Тюрингияга сафари чоғида журналистларга маълум қилишича, федерал ҳукумат Лейпсиг аеропортида топилган дрон ортида ким тургани ҳақида ҳозирча аниқ хулоса чиқара олмайди.
Добриндтнинг сўзларига кўра, Германия ҳукумати ҳодисага бир томонлама баҳо бериш учун етарли тасдиқланган маълумот ва асосларга эга эмас. "Россия ўзининг ҳозирги хатти-ҳаракатлари билан унга нисбатан шубҳалар пайдо бўлишини анча осонлаштирмоқда. Бироқ айни пайтда буни исботлаш ниҳоятда қийин", - деди вазир.
Унинг таъкидлашича, Лейпсигда топилган дрон ортида ким тургани аниқланганидан сўнг, эҳтимолий жавоб чоралари бўйича қарор қабул қилинади. Бу масала мудофаа вазири Борис Писториус, ташқи ишлар вазири Ёханн Вадефул ва канслер Фридрих Мерс иштирокида муҳокама қилиниши кутилмоқда. Айни пайтда Германия махсус хизматлари иштирокида ҳодиса юзасидан тергов "максимал даражада жадал" олиб борилмоқда.
Добриндт Лейпсигдаги воқеани алоҳида бир ҳодиса сифатида баҳоламаслигини ҳам билдирди. Унинг фикрича, бундай ҳаракатлар Германияни сиёсий ва ижтимоий жиҳатдан беқарорлаштиришга қаратилган янги турдаги гибрид таҳдидларнинг бир қисми бўлиши мумкин.
5-августга ўтар кечаси Лейпсиг-Галле аеропортида украин юк самолёти яқинидан келиб чиқиши номаълум бўлган учувчисиз аппарат аниқланган эди. Маълумотларга кўра, дрон портловчи модда ва детонатор билан жиҳозланган бўлган. Аппаратнинг қаердан келгани ва кимга тегишли экани ҳозирча аниқланмаган. Бироқ АҚШ разведкаси дрон Россия ҳукумати билан боғлиқ бўлиши эҳтимолини илгари сурган.
Терговчилар эътиборини тортган жиҳатлардан бири - аппаратнинг юқори профессионал даражада тайёрлангани. Маълумотларга кўра, дрон оддий дўкондан харид қилинмаган, балки махсус мақсад учун ясалган. Унинг тузилиши ҳужумга тайёргарлик тасодифий жиноятчилар ёки ҳаваскорлар томонидан амалга оширилмаган бўлиши мумкинлигини кўрсатади.
Бундан ташқари, дрон Семтех туридаги кучли портловчи модда билан жиҳозланган. Мутахассислар баҳосига кўра, ундаги портловчи модда самолётга жиддий зарар етказиш, ҳатто уни портлатиб юбориш учун етарли бўлиши мумкин эди. Дие Зеит маълумотига кўра, Семтех қора бозорда ҳам учраб туради, бироқ бу турдаги портловчи модда кўпроқ ҳарбий мақсадларда қўлланади.
Шу сабабли терговчилар кўриб чиқаётган асосий версиялардан бири - эҳтимолий ҳужумга тайёргарликда муайян давлатга алоқадор тузилма иштирок этган бўлиши мумкинлиги. Ҳозирча Германия расмийлари бу версияни бирор давлатга боғлаш учун етарли далиллар мавжуд эмаслигини таъкидламоқда.