Гана банкнотларидан «пулли гулдасталар» ясагани учун етти киши ҳибсга олинди
Ҳибсга олишлар мамлакатнинг миллий валютадан нотўғри фойдаланиш ва уни суиистеъмол қилишга чек қўйиш борасидаги саъй-ҳаракатларининг бир қисмидир.
Гана банкноталаридан «пулли гулдасталар» ясагани учун етти киши ҳибсга олинди
Гана седисидан нотўғри фойдаланиш, жумладан, банкноталарни шикастлаш ёки ноқонуний равишда ўзгартириш қонунга хилофдир
Гана расмийлари банкноталардан «пулли гулдасталар» ясашда гумон қилиб, етти кишини ҳибсга олди.
Гана Банкининг маълум қилишича, бундай амалиёт ноқонуний бўлиб, миллий валюта — седидан нотўғри фойдаланиш ва унга нисбатан номуносиб муносабатда бўлиш ҳисобланади.
Полиция кўмагида амалга оширилган ҳибсга олишлар тезкор маълумотдан сўнг юз берди ва бу пойтахт Аккранинг турли ҳудудларида гумонланувчилар — барчаси аёллар бўлган шахсларга нисбатан рейд ўтказилишига сабаб бўлди.
Ушбу ҳибсга олишлар миллий валютадан нотўғри фойдаланишга қарши қаратилган энг йирик ҳуқуқни муҳофаза қилиш ҳаракати бўлди. Июль ойида банк бу каби ҳаракатлар ҳуқуқбузарлик деб баҳоланиши мумкинлиги ҳақида огоҳлантириш эълон қилган эди.
Унда «миллий валютанинг қадрсизланишига ёки шикастланишига олиб келадиган ҳаракатлар, жумладан, унинг қонуний қиймати ёки фойдаланилишига путур етказадиган ҳар қандай хатти-ҳаракатлар»дан тийилиш сўралган.
Банкноталардан ясалган гулдасталар кўпинча тўйлар, туғилган кунлар, битирув кечалари ва бошқа байрамлар учун совға сифатида буюртма қилинади.
Полиция тергов ҳаракатларини бошлади ва расмийлар гумонланувчилар суд жавобгарлигига тортилишини маълум қилди. Уларга суд томонидан белгиланадиган жарима ёки озодликдан маҳрум қилиш жазоси берилиши мумкин.
Гана Банкининг валюта департаменти расмийси Дина Бонзининг айтишича, бундай фаолиятга ёрдам берадиган ёки уни рағбатлантирадиган ҳар қандай шахс ҳам ҳибсга олиниши ва жавобгарликка тортилиши мумкин.
«Гана седиси қонуний тўлов воситасидир... ва унга ҳурмат билан муносабатда бўлиш керак. Валютадан нотўғри фойдаланиш ёки уни суиистеъмол қилиш ҳуқуқбузарлик ҳисобланади ва қонунга мувофиқ санкцияларга сабаб бўлиши мумкин», деди у.
«Бугунги ҳибсга олиш жамоатчилик учун аниқ огоҳлантириш бўлиши керак. Келинг, барчамиз Гана седисига ҳурмат билан муносабатда бўлайлик».
Марказий банк тўйлар каби тадбирларда пул сочиш, банкноталарга ёзиш ёки уларни ўзгартириш, шунингдек, улардан тўйлар, туғилган кунлар ва бошқа маросимларда гулсимон гулдасталар каби безакларда фойдаланиш каби ҳаракатлардан бир неча бор огоҳлантирган.
Пулдан безак сифатида фойдаланиш сўнгги йилларда Ганада кенг тарқалди, шунингдек, бу амалиёт бошқа Африка мамлакатларида ҳам оммалашмоқда.
Сўнгги йилларда Кения, Нигерия, Жанубий Африка ва Ботсвана расмийлари ҳам миллий валюталардан нотўғри фойдаланишга қарши огоҳлантиришлар эълон қилган.