Габон саккиз ойлик тақиқдан сўнг ижтимоий тармоқларга кириш тикланганини маълум қилди

Габон саккиз ойлик тақиқдан сўнг ижтимоий тармоқлардан фойдаланиш қайта тикланганини маълум қилди

Габон саккиз ой олдин жорий этилган ва ўша пайтда кенг эътирозларга сабаб бўлган ижтимоий тармоқларга қўйилган тақиқни бекор қилганини маълум қилди.

Коммуникация бўйича олий кенгаш (HAC) шанба куни телемурожаатда ушбу қарор бекор қилинганини эълон қилди.

Чеклов 17 февраль куни жорий этилган эди. Ўшанда HAC интернетдаги контент мамлакатда низоларни авж олдираётгани ва парчаланишни чуқурлаштираётганини билдирган эди.

Аҳолиси тахминан 2,5 миллион кишини ташкил этувчи ушбу Марказий Африка мамлакатида бу қарор кутилмаган ҳол бўлди. Бу ерда Facebook, TikTok, YouTube ва Instagram каби платформалар, айниқса, улардан ҳам бизнес, ҳам ҳордиқ чиқариш учун фойдаланадиган ёшлар орасида жуда оммабоп.

Тақиқдан сўнг кўпчилик ижтимоий тармоқлардан фойдаланишда давом этиш учун VPN’лардан фойдаланди.

Ушбу чора Габон президенти Брис Олиги Нгема сайланганидан бир йилдан камроқ вақт ўтиб, ижтимоий ғалаёнлар авж олган бир пайтда жорий этилган эди.

Ўқитувчилар ва давлат хизматчилари иш ҳақи жуда камлиги ҳамда меҳнат шароитлари ёмонлигини айтиб, иш ташлаш ўтказган эди.

Мухолифат бу чеклашни ваколатни суиистеъмол қилиш деб баҳолади.

Нгема ўтган йилги сайловларда 90% дан ортиқ овоз билан ғалаба қозонган эди. Бундан икки йил олдин унинг ҳарбий тўнтариши Бонго оиласининг эллик йилдан ортиқ давом этган бошқарувига чек қўйганди.

Ўшанда у нефть ва ёғочга бой митти мамлакат бўлмиш Габонни ислоҳ қилишга ваъда берган эди. Мамлакатнинг аввалги ҳукуматлари маълумотларни назорат қилиш учун рақамли чекловлардан фойдаланиб келган.