Ғарбий соҳилдаги зўравонликлар ва Россияда қулаган стратегик бомбардимончи – кун дайжести
Ўтган кун давомида жаҳонда рўй берган энг асосий воқеа ва янгиликлар шарҳи билан кундалик хабарномада таништирамиз.
Ғарбий соҳилдаги зўравонликлар ва Россияда қулаган стратегик бомбардимончи – кун дайжести
**Ғарбий соҳилдаги зўравонликлар**
Исроил босиб олган Ғарбий соҳилда яҳудий кўчманчиларнинг фаластинликларга қарши ҳужумлари тўхтамаяпти. Реутерс гувоҳларга таянган ҳолда хабар беришича, Рамаллаҳ шимолидаги бир қишлоқда 100 дан ортиқ кўчманчи фаластинлик оиланинг уйига қайтишига йўл қўймаган ва Исроил ҳарбийлари билан тўқнашган.
Тубаси оиласига тегишли икки уй кўчманчилар томонидан бир неча ҳафта аввал эгаллаб олинган эди. Шундан бери оила қишлоқнинг бошқа қисмида яшаб келмоқда. Душанба куни кечқурун Исроил армияси оилани уйига олиб бориб, уни кўчманчилардан ҳимоя қилишга рози бўлган. Бироқ гувоҳларнинг айтишича, оила уйга кириб боргач тахминан 10 дақиқа ўтиб, кўчманчилар гуруҳи бостириб келган. Исроил армияси баёнотига кўра, улар уйларга ўт қўйган, йўлларни тўсиб қўйган ва ҳарбийларга тош отган. Оқибатда уч офицер жароҳат олган.
«Зўравонлик сабабли оилани уйига қайтариш вазифаси бажарилмади», дейилади армия баёнотида. Ҳарбийлар икки кўчманчи ҳибсга олингани ва тергов бошланганини билдирди.
Фаластинлик уй эгаларидан бири Реутерсъга уйининг таниб бўлмас даражада вайрон қилинганини айтди: эшик, дераза, пол ва зиналар бузиб ташланган. Уйнинг деворлари кўчманчилар ёққан шиналар тутунидан қорайиб кетган.
Сешанба куни Ғарбий соҳилдаги Ал-Муғаййир қишлоғида ҳам кўчманчилар бир нечта машинани ёқиб юборган.
Исроил бош вазири Бинямин Нетаняҳу зўравонликни қоралаб, айбдорларни жавобгарликка тортишга чақирди. Бироқ исроиллик ва фаластинлик ҳуқуқ ҳимоячиларининг айтишича, кўчманчилар зўравонлик учун жуда кам ҳолларда жазоланади.
АҚШда сунъий интеллект хавфсизлиги борасидаги хавотирлар кучайиб бораётган бир пайтда, АҚШ президенти Доналд Трамп сешанба куни Оқ уйда технология компаниялари раҳбарлари билан учрашди. Унинг айтишича, компаниялар сунъий интеллект учун ихтиёрий стандартлар жорий этишга келишиб олган.
Трамп ўз ижтимоий тармоғида эълон қилган келишув матнига кўра, компаниялар сунъий интеллект тизимлари ишлаб чиқувчилар кўзлагандек ишлаётганини текшириш учун мустақил аудиторлар билан ҳамкорлик қилади. Шунингдек, улар ўз воситалари техник тизимларга кўзда тутилмаган тарзда бузиб кирмаслигини таъминлашга ҳаракат қилади.