Нетаняху Ғарбий Соҳилда яҳудий кўчманчиларининг ноқонуний пунктларини бузишни буюрди

Нетаняху Ғарбий Соҳилдаги яҳудий кўчманчиларнинг ноқонуний пунктларини бузишни буюрди

Исроил бош вазири Бинямин Нетаняху босиб олинган Ғарбий Соҳилда рухсациз қурилган яҳудий аҳоли пунктларини бузиб ташлаш ҳақида топшириқ берди. Бу ҳақда вазиятдан хабардор икки манба 6-сентябр куни маълум қилди. Қарор АҚШнинг фаластинликларга қилинган ҳужумларга чек қўйиш бўйича босими фонида қабул қилинган.

Манбаларга кўра, буйруқ Исроил давлатининг расмий рухсатисиз барпо этилган манзилларга тегишли. Бундай обьектлар одатда йиғма уйлардан иборат бўлиб, уларда оз сонли кўчиб келганлар яшайди. Исроил ҳукумати вақти-вақти билан бундай иншоотларни бузиб ташлайди, баъзан эса уларни расман тан олиб, давлат ғазнасидан молиялаштиришга ҳам рухсат беради.

Бузиш ишлари қачон бошланиши ҳозирча номаълум. БМТ органлари ва аксарият давлатлар Исроилнинг барча аҳоли пунктларини халқаро ҳуқуққа кўра ноқонуний деб ҳисоблайди. Улар Ғарбий Соҳилни ҳарбий назорат остидаги босиб олинган ҳудуд деб билади. Исроил эса бу ҳудудларни босиб олинган эмас, балки баҳсли деб таъкидлайди.

Манбаларга кўра, Нетаняху бу буйруқни Исроилнинг энг яқин иттифоқчиси бўлган АҚШ босими остида берган. Қўшма Штатларнинг Исроилдаги элчиси Майк Ҳакаби 5-сентябр куни зўравон яҳудий кўчманчиларни террорчилар деб атади. У Ғарбий Соҳилдаги шаҳарлардан бирида фаластинлик америкаликлар билан учрашди ва элчи бундай шахсларга чора кўриш кераклигини айтди.

Исроилнинг Йнет нашрига кўра, Нетаняхунинг буйруғи босиб олинган ҳудудлардаги 100 га яқин пунктга тааллуқли. Исроил бош вазири идораси ва ҳарбийлар бу хабарга изоҳ бермади. Одатда бундай обьектларни тозалашда ҳарбийлар иштирок этади.

Исроил молия вазири Безалел Смотрич Қуддусдаги анжуманда Йнет хабари ҳақида гапирди. Унинг айтишича, Нетаняху А ва Б ҳудудларида қурилган пунктларни бўшатиш бўйича топшириқ берган. Бу ҳудудлар Ғарбий Соҳилнинг аксарият фаластинликлар яшайдиган қисмидир. 1990-йилларда Исроил ва Фаластин озодлик ташкилоти ўртасида тузилган Ослодаги тинчлик битимига кўра, Ғарбий Соҳил учта зонага — А, Б ва С га бўлинган.

Смотричнинг ўзи ҳам кўчманчи яҳудийлардан бири. У янги уй-жой лойиҳаларига раҳбарлик қилган ва ноқонуний қурилган уйларни расман тан олган. Смотрич Нетаняхунинг қарорига қўшилмаслигини, бироқ ҳукумат С ҳудудида манзилгоҳларни ривожлантиришда катта натижаларга эришганини айтди.

Пеасе Нов ташкилоти маълумотларига кўра, босиб олинган Ғарбий Соҳилда 340 та ноқонуний ҳамда Исроил ҳукумати расман тан олган 146 та аҳоли пункти мавжуд. Август ойида яҳудий кўчманчилари қўшни қишлоқдаги фаластинликларнинг уйларини қамал қилди. Улар орасида фаластинлик америкаликка тегишли уй ҳам бор эди. Кейинчалик ҳарбийлар уларни ҳудуддан чиқариб юборди.

Қишлоқнинг фаластинлик аҳолиси яҳудийлар томонидан ҳануз тазьиқ ва таҳдидларга учраётганини билдирди. Исроил ҳукумати бундай зўравонликларни қоралайди, аммо айбдорлар камдан-кам ҳолларда ҳибсга олинади ва жавобгарликка тортилади.

Аввалроқ Исроил миллий хавфсизлик вазири Итамар Бен-Гвир барча фаластинликларни Ғазо секторидан мажбуран чиқариб юбориш ва хорижга жўнатиш режасини эълон қилганди. Унга кўра, биринчи йилда Ғазодан 250 минг фаластинлик чиқариб юборилади. Қолган 2 миллионга яқин аҳоли эса кейинги олти йил давомида кўчирилади.

У қайси давлатлар эканини очиқламасдан, Ғазодаги фаластинликларни қабул қилишга тайёр мамлакатлар борлигини даъво қилган. Босиб олинган ҳудудлардаги тинч аҳолини мажбуран кўчириш Женева конвенсияларига кўра уруш жинояти ҳисобланади.