Футзал бўйича Ўзбекистон терма жамоаси Тожикистон билан ўйнайди

Миллий терма жамоа халқаро турнирларга тайёргарлик доирасида 2-10 ноябрь кунлари Тошкентда йиғин ўтказади ва Тожикистон футзалчилари билан икки бор куч синашади.

1 соат олдин

Футзал бўйича Ўзбекистон терма жамоаси Тожикистон билан ўйинлар ўтказади

Футзал бўйича Ўзбекистон терма жамоаси 2-10 ноябрь кунлари Тошкентда ўқув-машғулот йиғинини ўтказади ва Тожикистон миллий жамоаси билан иккита ўртоқлик ўйинида майдонга тушади. Тайёргарлик ФИФАнинг халқаро ойнаси даврига мўлжалланган. Бу ҳақда Ўзбекистон футзал федерацияси хабар беради.

Миллий жамоага номзодларнинг машғулотлари Ўзбекистон футбол ассоциацияси Терма жамоалар марказининг спорт залида бўлиб ўтади. Йиғин доирасида мураббийлар штаби тожикистонлик футзалчилар билан иккита назорат учрашувини режалаштирган.

Биринчи ўйин 8 ноябрь куни Терма жамоалар маркази ҳудудида бўлиб ўтади. Томонларнинг ўзаро келишувига кўра, ўйин томошабинларсиз ўтказилади. Иккинчи учрашув 10 ноябрь куни соат 18:00 га «Юнусобод» спорт мажмуасида белгиланган ва ишқибозлар учун очиқ бўлади.

Йиғинда иштирок этиш учун 22 нафар футзалчи чақирилди. Талабномага тўрт нафар дарвозабон, беш нафар ҳимоячи, тўққиз нафар қанот ўйинчиси ва тўрт нафар ҳужумчи киритилди. Таклиф этилганлар орасида Ўзбекистон ёшлар терма жамоасининг беш нафар вакили бор.

Ўзбекистон терма жамоаси таркиби:

Дарвозабонлар: Аббос Элмуродов (BMB), Аббос Ўлмасбеков (BMB), Жасурбек Ризбонов («Насаф»), Шоҳжаҳон Замирхонов (BMB).

Ҳимоячилар: Илҳом Ҳамроев (SQB), Анасхон Раҳматов («Насаф»), Суннатилла Жўраев («Насаф»), Жамолиддин Сатторов (BMB), Фазлиддин Ботиров (ОКМК).

Қанот ўйинчилари: Ҳусниддин Нишонов (BMB), Муҳаммадали Ҳусанбоев (BMB), Тоҳирбек Абдукаримов («Максам-Чирчиқ»), Даврон Чориев (BMB), Қувончбек Жаҳонов («Насаф»), Асилбек Вафоев («Насаф»), Беҳруз Самиев (Oil Star), Элдор Ниғматов («Хоразм»), Абдулборий Илёсов (SQB).

Ҳужумчилар: Аброр Аҳмедзянов (SQB), Бегзод Мирқосимов (BMB), Музаффар Абдукаримов («Олмалиқ»), Жавоҳирбек Абдулвосиев (BMB).

Ноябрь ойидаги йиғин ва ўртоқлик ўйинлари миллий жамоанинг бўлажак халқаро мусобақаларга тайёргарлигининг бир қисми бўлади.