Францияда йўловчи поезди рельсдан чиқиб кетди, камида 44 киши жароҳатланди
Франция транспорт вазирининг маълум қилишича, Нормандиядаги Руан-Кан йўналишида ҳаракатланаётган поезд бортида 180 нафар йўловчи бўлган.
Францияда йўловчи поезди рельсдан чиқиб кетди, камида 44 киши жароҳатланди
Франция полицияси Клеон коммунаси яқинидаги ҳалокат жойини ўраб олди.
Маҳаллий расмийларнинг маълум қилишича, Франция шимолида йўловчи поезди рельсдан чиқиб кетиши оқибатида камида 44 киши жароҳатланган, улардан бирининг аҳволи оғир.
18 ёшли аёл оғир аҳволда вертолётда шифохонага етказилган.
Транспорт вазири Филипп Табаронинг айтишича, Нормандиядаги Руан ва Кан шаҳарлари ўртасида қатнаётган поезд бортида 180 нафар йўловчи бўлган.
Унинг сўзларига кўра, жума куни кечқурун Руандан жанубда жойлашган Клеон коммунаси яқинида юз берган ҳалокат жойига 140 нафар ўт ўчирувчи ва бошқа қутқарув гуруҳлари юборилган.
Поезднинг рельсдан чиқиб кетиш сабаблари ҳозирча аниқ эмас.
Маҳаллий вақт билан соат 20:00 (Гринвич бўйича 18:00) дан сал олдин юз берган ҳалокатдан сўнг расмийлар кўп сонли қурбонлар билан ишлаш бўйича фавқулодда ҳаракатлар режасини ишга туширди.
Кейинроқ олинган фотосуратларда йўловчилар рельсдан чиқиб кетган поездни тарк этаётгани акс этган, Франция ОАВлари эса учта вагон ағдарилиб кетгани ҳақида хабар берган.
Франция давлат темир йўл оператори SNCF ушбу ҳудуддаги йўналишларда «жиддий узилишлар» бўлаётганини ва муқобил автобуслар ташкил этилишини маълум қилди.
Расмийлар аҳолини ушбу ҳудуддан узоқроқ туришга чақирди.