Францияда Сальвадор Дали муқоваси билан безатилган 210 килограммлик "Муқаддас Иоанн Богослов Апокалипсиси" китоби ўғирлаб кетилди

Францияда музейдан Сальвадор Дали муқовалаган, вазни 210 килограмм бўлган «Авлиё Иоанн Богослов Апокалипсиси» китоби ўғирлаб кетилди

Франциянинг Иссуар шаҳридаги музейдан номаълум шахслар дунёдаги энг оғир ва энг қиммат китобнинг ноёб нусхаси — вазни қарийб 210 килограмм бўлган «Авлиё Иоанн Богослов Апокалипсиси»ни ўғирлаб кетишди. Унинг бронзадан ишланган муқоваси Сальвадор Дали томонидан тайёрланган: у 150 килограмм тош босади ҳамда олтин, қимматбаҳо тошлар ва чиғаноқлар билан безатилган. Полиция ҳозирча бунчалик оғир экспонатни қандай қилиб сезиларсиз олиб чиқиб кетишганини тушуна олмаяпти.

Ўғрилик якшанбага ўтар кечаси Пюи-де-Дом департаментидаги Замонавий санъат марказида содир бўлган. Иссуар мэри бу йўқотишни «бебаҳо» деб атади, асар эгаси эса буни «Франция меросига берилган зарба» деб баҳолади.

Нашрнинг ўзи 1958 йилда француз ношири Жозеф Форе томонидан ўйлаб топилган. Лойиҳа устида XX асрнинг 14 нафар таниқли рассом ва ёзувчилари, жумладан Жан Кокто, Бернар Бюффе ва Жан Жионо ишлаган. Дали китоб учун улкан бронза муқова яратган.

Китоб 150 та улкан пергамент варақдан иборат. Уни яратиш учун 300 минг қўй терисидан материаллар саралаб олинган, каллиграфик безатилишига эса қарийб 2 минг соат вақт кетган. Матнда олтиндан ишланган 550 та ҳарф мавжуд.

1961 йилдан 1972 йилгача ушбу асар дунёнинг турли мамлакатларида деярли 150 марта кўргазмага қўйилган. Кейинчалик у Швейцарияда сақланган, сўнгра уни бўлаклаб сотишни режалаштирган япониялик эгалари қўлига ўтган. 2003 йилда китобни Иссуардаги санъат асарларини реставрация қилиш компанияси раҳбари Кристиан Каруцо сотиб олган ва уни ўз музейида намойиш этиб келган.

Ўғрилар 210 килограммлик экспонатни айнан қандай қилиб олиб чиқиб кетишгани ва умуман музейга қандай киришгани ҳозирча номаълум. Тергов билан Клермон-Ферран жандармерияси шуғулланмоқда.

Бу ўғрилик француз музейларидаги навбатдаги шов-шувли талончилик бўлди.

Ўтган йили Луврдан қиймати қарийб 88 миллион евролик Франция тожи жавоҳирлари олиб чиқиб кетилган эди.

Июль ойида Лалик музейидан қиймати қарийб 4,5 миллион евролик 27 та экспонат ўғирланди, ўша ойнинг ўзида Бургундиядаги музейдан малика Викснинг қарийб 2,5 минг йиллик олтин гривнаси (бўйин тақинчоғи) ўғирлаб кетилди.

Сентябрь ойида эса икки нафар жиноятчи Кань-сюр-Мердаги Ренуар музейига бостириб кириб, уч дақиқадан камроқ вақт ичида тўртта картинани олиб чиқиб кетди.