Франция жанубига ёпирилган бўрон ва сув тошқини оқибатида камида тўрт киши ҳалок бўлди

«Адам» бўрони келтириб чиқарган сув тошқинлари оқибатида Францияда камида тўрт киши ҳалок бўлди ва яна бир киши жароҳатланди.

Сешанба куни бўрон Франция жанубида кенг кўламли сув тошқинларини келтириб чиқарди, кўчаларни сув босди ва транспорт ҳаракатини издан чиқарди.

Ҳалок бўлганлар орасида Буш-дю-Рон минтақасидаги ертўлада чўкиб кетган ҳолда топилган 86 ва 26 ёшли икки аёл бор.

Корсикага ҳам кучли ноқулай об-ҳаво таъсир кўрсатди. Маҳаллий ОАВнинг хабар беришича, сешанба куни тошқин сувлари 4х4 автомобилини оқизиб кетган — йўловчилардан бири ойна орқали чиқишга муваффақ бўлган, аммо бошқа бир эркак кейинроқ ўлик ҳолда топилган.

Расмийлар тўртинчи ўлим ҳолати ҳақида қўшимча маълумот бермади.

Монпелье ва Марсель ўртасида жойлашган Мурье ва Сен-Мартен-де-Краода сув тошқинидан сўнг ўнлаб аҳоли фавқулодда бошпаналарга жойлаштирилди. Расмийлар ушбу ҳудудда бир киши тан жароҳати олганини маълум қилди.

Транспорт вазири Филипп Табаро X тармоғида ушбу ҳудуддаги йўллар ва темир йўл тармоқларига ҳам зарар етганини ёзди.

«Сув даражаси мисли кўрилмаган даражада кўтарилди», — деди Буш-дю-Рон департаменти префекти Жак Витковски чоршанба куни берган баёнотида.

Витковски «қийин аҳволда қолганларнинг барчаси ҳақида қайғураётганини» айтди ва қўшимча қилди: «Биз бир нечта муаммоларни ҳал қилиш учун фавқулодда даражада сафарбар қилинганмиз».

Францияда янада кучли ноқулай об-ҳаво кутилмоқда, Атлантикадан кириб келаётган янги «Остин» бўрони мамлакатнинг шимоли-ғарбига етиб бориши прогноз қилинмоқда.

Франция об-ҳаво хизмати (Météo-France) пайшанба оқшомидан жумага ўтар кечаси Ғарбий департаментларнинг бештаси учун шамол бўйича зарғалдоқ (оранж) даражали хавф эълон қилди.

Огоҳлантириш Кот-д’Армор, Финистер, Морбиан, Иль ва Вилен ҳамда Манш ҳудудларини қамраб олади.

19 октябрдан бошланган кучли ёғингарчилик Франция жануби-шарқида йирик сув тошқинларига сабаб бўлди.

«Адам» бўрони Испания шарқида ҳам кучли сув тошқинларини келтириб чиқарган эди, у ерда камида тўрт киши ҳалок бўлди.

Ўрта ер денгизи соҳилидаги бир нечта шаҳарлар тошқин сувлари туфайли ташқи дунёдан узилиб қолди, томларда қолиб кетган одамларни қутқариш учун вертолётлардан фойдаланилди.

Душанба куни ўтказилган қутқарув операциялари чоғида Фавқулодда вазиятлар ҳарбий бўлинмаси аъзолари Валенсиянинг Олива шаҳрида бир аёлнинг жасадини топдилар.

Дам олиш кунларида яна икки аёлнинг ўлими тасдиқланди. Бир аёлнинг жасади Валенсиянинг шарқий минтақасидаги Сагунто пляжига чиқиб қолган, бошқаси эса Барселона яқинидаги Кабрера-де-Марда тошқин сувлари томонидан оқизиб кетилган.

Испания Бош вазири Педро Санчес сешанба куни Валенсия минтақасига ташрифи чоғида миллий ҳукумат қайта тиклаш ишларини қўллаб-қувватлаш учун ресурслар ажратишини ваъда қилди.

Сешанба куни Валенсия ҳукумати «Адам» бўронидан жабр кўрганлар учун 23,5 миллион евро (20 миллион фунт стерлинг) миқдоридаги ёрдам пакетини тасдиқлади.