Филиппиннинг собиқ президенти Дутерте Халқаро жиноий судда илк бор шахсан кўриниш берди
У гиёҳвандликка қарши уруши билан боғлиқ минглаб ўлимлар туфайли инсониятга қарши жиноятларда айбланиб, суд қилиниши кутилмоқда.
Филиппиннинг собиқ президенти Дутерте Халқаро жиноий судда илк бор шахсан кўриниш берди
Родриго Дутерте 2025 йилнинг мартидан буён Гаагада ҳибсда ушлаб турилибди
Филиппиннинг собиқ президенти Родриго Дутерте Гаагадаги Халқаро жиноий судда шахсан ҳозир бўлди, бу ерда у инсониятга қарши содир этилган жиноятларда айбланиб, суд олдида жавоб бериши кутилмоқда.
У гиёҳванд моддаларга қарши олиб борган қонли уруши билан боғлиқ айбловларга дуч келмоқда, бу уруш натижасида ўн минглаб майда гиёҳванд моддалар сотувчилари судсиз қатл этилгани айтилади.
81 ёшли собиқ раҳбар чоршанба куни тўқ рангли костюм ва бўйинбоғсиз оқ кўйлакда етиб келди. Бу унинг 18 ой олдин Манилада ҳибсга олинганидан бери илк бор шахсан кўриниш беришидир.
Шу пайтгача у судда фақат видеоалоқа орқали қатнашган ва кейинчалик бир нечта суд мажлисларини ўтказиб юборган эди.
Дутертенинг адвокатлари собиқ раҳбарнинг соғлиғи ёмонлашгани сабабли суд жараёнига лаёқатсиз бўлиб қолганини айтганидан сўнг, Халқаро жиноий суд чоршанба кунига мақомни аниқлаш бўйича эшитув тайинлади. Биринчи суд куни ноябрь ойига белгиланган.
Гиёҳванд моддаларга қарши уруш Дутертенинг 2016 йилдан 2022 йилгача давом этган президентлик даврининг асосий хусусияти бўлган эди. У иқтисодий ўсишни қўллаб-қувватлаш учун тинчлик ва тартиб зарурлигини айтган.
Халқаро жиноий суд 2011 йил 1 ноябрдан — Дутерте жанубдаги йирик Давао шаҳри мэри бўлган даврдан бошлаб, 2019 йил 16 мартгача — у Филиппинни ХЖС аъзолигидан чиқариб юборган давргача бўлган қотилликларни ўрганмоқда.
Дутертенинг адвокати Питер Хейнс судга унинг ҳимояси остидаги шахсда «хотиранинг жиддий бузилиши» борлигини ва бу унга юридик гуруҳи билан ишлашга халақит бераётганини айтди. Прокурорлар бу даъвони рад этишди.
2019 йилда, ҳали президентлик даврида, Дутерте ўзида асаб тизими фаолиятининг бузилишига олиб келадиган аутоиммун касаллик — миастения борлигини маълум қилган эди. 2016 йилда 71 ёшида у ўша пайтгача сайланган энг кекса Филиппин президенти бўлган.
Дутерте ХЖСда суд жараёнига дуч келаётган бир пайтда, унинг оиласи Филиппин устидан назорат ўрнатиш учун юқори даражадаги сулолавий курашга киришган. Унинг қизи, вице-президент Сара Дутерте президент Фердинанд «Бонгбонг» Маркос билан кескин равишда юз кўринишмас бўлиб қолган.
2022 йилги сайловларда йирик ғалабани таъминлашга ёрдам берган Дутерте-Маркос иттифоқининг парчаланиши 2025 йил март ойида Манила аэропортида Родриго Дутертенинг ҳибсга олинишига йўл очди.
Сара Дутерте 2028 йилги сайловларда Маркоснинг ўрнини эгаллаш учун асосий даъвогар ҳисобланади, чунки амалдаги президент конституцияга кўра иккинчи муддатга номзодини қўя олмайди.
Бироқ, у импичмент судида ўз сиёсий келажаги учун ҳам курашмоқда, у ерда айбдор деб топилиш уни давлат лавозимларига номзод бўлиш ҳуқуқидан маҳрум қилади.
У давлат маблағларини нотўғри сарфлашда ҳамда Маркос, биринчи хоним Лиза Аранета-Маркос ва Маркоснинг амакиваччаси, конгрессмен Фердинанд Мартин Ромуалдесни ўлдириш билан таҳдид қилишда айбланмоқда.
Дутертенинг ХЖС ҳибсхонасидаги биринчи кечаси суд учун муҳим бурилиш палласидир