ФИФА ўйинчиларнинг шартномаларидаги товон пули тўғрисидаги қоидаларга жиддий ўзгартиришлар киритади
ФИФА ўйинчилар шартномаларидаги товон пули тўғрисидаги қоидаларга жиддий ўзгартиришлар киритади
Халқаро футбол ассоциациялари федерацияси (ФИФА) футболчилар ва клублар ўртасидаги шартномаларни муддатидан олдин сотиб олиш ва бекор қилиш тартиб-таомилларини тартибга солувчи 17-моддага ўзгартириш киритади. The Touchline нашрининг хабар беришича, янги нормалар 2027 йил 1 январдан кучга киради.
Янгиланган қоидаларга кўра, клублар шартномалардаги товон пули тўғрисидаги бандни оқилона стандартларга мувофиқлаштиришлари керак бўлади. Бошқача айтганда, ўйинчи ва жамоа ўртасидаги келишувни бир томонлама бекор қилиш суммаси шартноманинг реал шартлари ва муайян вазиятни ҳисобга олган ҳолда белгиланиши лозим.
Бундай қарор сўнгги пайтларда клублар товон пули миқдорини сунъий равишда ошириб юбораётгани сабабли қабул қилинди. Ҳозирда кўплаб жамоалар ўз етакчиларини сақлаб қолиш учун шартномаларга ҳатто 1 миллиард еврогача бўлган товон пули суммаларини киритмоқда. Бу футболчининг бошқа клубга ўтишини қийинлаштиради ва сотиб олувчи жамоаларнинг у билан келишув имзолаш имкониятларини сезиларли даражада камайтиради. Айнан шундай сунъий тўсиқларнинг олдини олиш учун ФИФА ушбу қоидани ўзгартиришга қарор қилди.
Товон пули — бу футболчининг шартномасида кўрсатилган белгиланган суммадир. Агар ушбу сумма тўланса ва ўйинчининг ўзи бошқа жамоа билан шахсий келишувга эришса, унинг ҳозирги клуби трансферга тўсқинлик қилиш ҳуқуқини йўқотади.