Фарғона вилояти ва Коян вилоятлараро ҳамкорликни кенгайтиради

Фарғона вилояти ва Коян ҳудудлараро ҳамкорликни кенгайтириш ниятида

Фарғона вилояти ва Жанубий Кореянинг Коян шаҳри савдо-иқтисодий, инвестициявий, таълим ва туризм соҳаларида ҳамкорликни мустаҳкамлашни режалаштирмоқда. Фарғона вилояти ҳокими Хайрулло Бозоров ушбу масалаларни Коян мэри Мин Гён Со билан муҳокама қилди.

Музокаралар Фарғона вилояти раҳбарининг Корея Республикасига амалий ташрифи доирасида бўлиб ўтди. Томонлар ўзаро манфаатли алоқаларни ривожлантириш ва истиқболли йўналишларда қўшма ташаббусларни амалга ошириш юзасидан фикр алмашдилар.

Учрашув аввалида иштирокчиларга Фарғона вилояти ва Коян шаҳрининг иқтисодий ва инвестициявий салоҳияти, инфратузилмаси, шунингдек, таълим, туризм ва бошқа соҳалардаги ҳамкорлик имкониятлари ҳақида видеоматериаллар намойиш этилди.

Мин Гён Со Фарғона вилоятидан келган ёшларнинг Чунгбу университетида таҳсил олиши бошланишини икки ҳудуд ўртасидаги муносабатларни ривожлантиришдаги муҳим босқич деб атади. Коян мэри нафақат таълим, балки иқтисодиёт, инвестиция фаолияти, бизнес, туризм ва бошқа соҳаларда ҳам ҳамкорликни кенгайтиришга тайёрлигини маълум қилди.

Хайрулло Бозоров Фарғона вилояти ва Коян ўртасидаги алоқаларнинг мустаҳкамланиши ҳар икки томон учун янги имкониятлар очаётганини таъкидлади. Вилоят раҳбарининг таклифлари қаторидан бизнес вакиллари ўртасида тўғридан-тўғри алоқаларни йўлга қўйиш, делегацияларнинг ўзаро ташрифларини ташкил этиш, аниқ инвестициявий ва савдо лойиҳаларини тайёрлаш, шунингдек, таълим муассасалари ўртасидаги шерикликни янада ривожлантириш жой олди.

Коян — Корея Республикасининг йирик шаҳарларидан бири бўлиб, Кёнгидо провинциясида жойлашган ва Сеул билан бевосита чегарадош. Унинг майдони 268 кв. км дан ошади, аҳолиси эса 1,07 миллиондан ортиқ кишини ташкил этади.

Шаҳар замонавий транспорт инфратузилмаси ҳамда халқаро кўргазмалар ва конгресслар саноати ривожлангани билан ажралиб туради. Коянда, шунингдек, медиа ва креатив индустриялар, туристик ва ижтимоий инфратузилма тақдим этилган. Бу ерда Корея Республикасининг энг йирик халқаро кўргазма-конгресс мажмуаларидан бири — KINTEX жойлашган.

Учрашув якунларига кўра, томонлар Фарғона вилояти ва Коян вакиллари иштирокида қўшма ишчи гуруҳ тузишга қарор қилдилар.

Ишчи гуруҳ аниқ чора-тадбирларни ўз ичига олган «йўл харитаси»ни тайёрлаши лозим, шундан сўнг томонлар ҳамкорликни изчил кенгайтириш ва эришилган келишувлар ҳамда ташаббусларни амалий босқичга ўтказиш ниятида.