Фарғонада қайнопасига ошхона чопқиси билан жароҳат етказган шахс 5 йилга қамалди
Фарғонада қайнопасини ошхона чопқиси билан жароҳатлаган эркак 5 йилга озодликдан маҳрум этилди
Фарғона вилоятининг Учкўприк туманида оилавий келишмовчилик чоғида хотинининг опасига ошхона чопқиси билан тан жароҳати етказган эркак 5 йилга қамалди.
Иш материалларига кўра, эр-хотин аввал телефонда тортишиб қолган. Эркак хотинига уйга келишини ва уни кутиб туришини айтган. Аёл эса уйга опаси билан борган ва эр-хотин ўртасидаги жанжал хонадонда ҳам давом этган.
Жанжал пайтида эркак хотинига ошхона чопқиси билан жароҳат етказмоқчи бўлган. Аммо чопқи уларни ажратишга уринган аёлнинг опасига теккан.
Жабрланувчи тан жароҳати олиб, шифохонага ётқизилган. Кўрсатилган тиббий ёрдам туфайли унинг ҳаёти сақлаб қолинган.
Жабрланувчи суд мажлисида ҳозир ҳам даволанаётганини билдирган.
Жиноят ишлари бўйича Учкўприк туман суди эркакни Жиноят кодексининг 104-моддаси 2-қисмининг “и” бандида (қасддан баданга оғир шикаст етказиш инсон аъзоларини ва тўқималарини олиш мақсадида) назарда тутилган жиноятни содир этишда айбдор деб топган.
Унга 5 йил муддатга озодликдан маҳрум қилиш жазоси тайинланган. Жазо умумий тартибли колонияда ўталиши белгиланган.