Фарғоналик икки аёлни фоҳишалик билан шуғулланиш учун Москвага юбормоқчи бўлишди

Фарғоналик икки аёлни фоҳишалик билан шуғулланиш учун Москвага юборишга уринишди

Фарғонада ДХХ ва ИИБ ходимлари одам савдосига чек қўйишди. Жиноятчи икки аёлга интим хизматлар кўрсатиш орқали пул топишни таклиф қилиб, уларни Москвага юбормоқчи бўлган.

Ҳуқуқ-тартибот идоралари маълумотларига кўра, Фарғонада яшовчи, муқаддам судланган 33 ёшли эркак икки аёлга Россия пойтахтига боришни ва у ерда интим хизматлар кўрсатиш орқали пул ишлашни таклиф қилган.

Эркак уларнинг авиачипталарини ўз ҳисобидан тўлаб беришни ваъда қилган. Бунинг эвазига Москвага етиб боргач, ишлаб топилган пулнинг ярмини унга беришни талаб қилган.

Жиноий режа тезкор тадбир давомида барбод қилинди. Эркак Фарғона халқаро аэропортида аёлларни Москвага юбораётган вақтида қўлга олинди.

Гумонланувчига нисбатан жиноят иши қўзғатилган. Тергов ҳаракатлари олиб борилмоқда. Ҳуқуқ-тартибот идоралари ходимлари воқеанинг барча тафсилотларини аниқламоқда.

Бу аёлларни фоҳишалик билан шуғулланиш учун бошқа мамлакатларга юборишга бўлган муваффақиятсиз уринишларнинг биринчиси эмас — аввалроқ ҳуқуқ-тартибот идоралари ходимлари уларни Туркияга олиб чиқиб кетиш бўйича бир нечта уринишларнинг олдини олишган эди.