Эрон уруши АҚШ ўқ-дорилари тақчиллигига олиб келди, дея тасдиқлади Пентагон инспектори
Инспектор, шунингдек, Президент Дональд Трампнинг АҚШ захиралари «деярли чексиз» деган даъволарига қарамай, таъминотда узилишлар борлигини аниқлади.
Эрон уруши АҚШ ўқ-дорилари тақчиллигига сабаб бўлди, деб тасдиқлади Пентагон инспектори
АҚШ Мудофаа вазирлиги бош инспекторининг маълум қилишича, Эрон билан уруш ўқ-дорилар «танқислиги»ни ва уларни етказиб беришда тиқинларни юзага келтирган. Бу АҚШда захиралар тугаб бораётганини қайта-қайта инкор этиб келаётган Президент Дональд Трампнинг сўзларига тўғридан-тўғри зиддир.
Трамп АҚШнинг ўқ-дори захиралари «деярли чексиз» эканини таъкидлаб, бунга тескари хабарларни «сохта хабарлар» (fake news) деб рад этган эди.
Бироқ, мустақил назорат органининг билдиришича, АҚШ февралдан июнгача ўқ-дорилар учун 22 миллиард доллардан ортиқ маблағ сарфлаган, бу эса «стратегик захиралар танқислиги»га олиб келган.
Янги ҳисобот одатда махфий сақланадиган маълумот — АҚШ қурол-яроғ захираларига доир илк бор тақдим этилаётган мустақил баҳодир.
Бундан олдинги тахминлар ҳам АҚШ учун жиддий тақчиллик манзарасини кўрсатган эди.
Уруш давомида АҚШ кучлари ҳам узоқ масофали қуруқликдаги ҳужум тизимларидан, ҳам Эроннинг ҳужумларини қайтариш учун сафарбар этилган ҳаво ва ракетага қарши мудофаа тизимларидан жуда катта миқдорда фойдаланди.
Стратегик ва халқаро тадқиқотлар маркази (CSIS) томонидан июль ойи охирида эълон қилинган баҳолашга кўра, баъзи тутиб қолувчи ракеталар, жумладан, Patriot ва THAAD (Terminal High Altitude Area Defense) тизимлари захиралари кескин камайган, айрим ҳолларда эса ярмидан кўпроққа қисқарган.
Бош инспектор ҳисоботида айнан қанча қурол қолгани очиқланмаган.
Шундай бўлса-да, унда захиралар танқислигига ишора қилинган ва ўқ-дориларни қайта етказиб беришга тўсқинлик қилаётган «саноат базасидаги тиқинлар» кўрсатиб ўтилган.
Ҳисоботда, шунингдек, Мудофаа вазирлиги тақчилликни бартараф этиш ва «фавқулодда вазиятларга тезкорлик билан жавоб қайтариш» учун ҳозирда «харид қилиш жараёнлари ва ишлаб чиқариш муддатларини соддалаштиришга» ҳаракат қилаётгани айтилади.
Трамп ва маъмуриятнинг бошқа расмийлари тақчиллик ҳақидаги хабарларни ёлғон ва «хиёнаткорона» деб кўрсатишга уринишди.
Масалан, Мудофаа вазири Пит Хегсет 4 август куни Х ижтимоий тармоғидаги постида тақчиллик ҳақидаги хабарларни «ҳақиқатга тўғри келмайди» деб атади.
Трамп эса 3 сентябрь куни Truth Social тармоғидаги узун постида АҚШ «деярли чексиз» миқдорда ўқ-дорига эга эканини ҳамда «захира тўплаётгани ва юз бериши мумкин бўлган ҳар қандай фавқулодда вазиятга тайёргарлик кўраётганини» айтди.
Назорат органи ҳисоботида, шунингдек, техникавий йўқотишлар 3,7 миллиард долларга етгани, бошқа харажатлар эса яна 7,4 миллиард долларни ташкил этгани айтилади. Умумий ҳисобда, АҚШ 28 февралдан 30 июнгача уруш учун 33,4 миллиард доллар (24,7 миллиард фунт стерлинг) сарфлаган.
Йўқотишлар орасида «турли шароитларда» вайрон қилинган тўртта F-15e қирувчи самолёти, юқори технологияли битта F-35 Joint Strike Fighter ва 30 та MQ-9 дронлари бор.
АҚШ ва Исроил зарбалари бошланганда, Трамп можаро бир неча ҳафта ичида тугашини қайта-қайта таъкидлаган эди.
Яқинда эса у можаро АҚШдаги ноябрь ойидаги оралиқ сайловлардан «кейингина» тугаши мумкинлигини айтди.
Сўровномалар уруш америкаликлар ўртасида оммабоп эмаслигини кўрсатмоқда.
Сентябрь ойи бошида эълон қилинган Reuters/Ipsos сўровномасига кўра, америкаликларнинг атиги 23 фоизи — ва республикачиларнинг атиги ярми — АҚШ Эрон билан ҳарбий ҳаракатлар бошланишидан олдингига қараганда кучлироқ мавқега эга бўлди, деб ҳисоблайди.