Эрон Ҳормузда АҚШнинг энг замонавий сувости дронини қўлга олди
Эрон Ҳормузда АҚШнинг энг замонавий сувости дронини қўлга олди
Эрон Ислом инқилоби қўриқчилари корпуси Ҳормуз бўғозида АҚШга тегишли учувчисиз сувости кемасини қўлга олганини маълум қилди. Бу воқеа ҳарбий амалиётларда сувости дронларидан қандай фойдаланилаётганини яна бир бор кўрсатди.
Эрон давлат ОАВларига кўра, қўлга олинган сувости дрони Калифорниядаги Андурил мудофаа компанияси ишлаб чиққан Диве-ЛД номли йирик автоном сувости аппаратидир.
Компания маълумотига кўра, узунлиги 5,8 метр бўлган бу аппарат турли вазифаларни бажаришга мўлжалланган. У минага қарши чоралар кўриш, денгиз тубини хариталаш, разведка маълумотларини тўплаш ҳамда кабел ва қувурлар каби сувости инфратузилмаларини текшириш имконига эга.
“Биз Ҳормуз бўғозида террорчи Америка армиясининг замонавий ва ақлли дрон кемаларидан бирини тутиб олдик. Бу аппарат энг сўнгги технологиялар билан жиҳозланган”, дейилади корпус ҳарбий-денгиз кучлари баёнотида.
Пентагон матбуот котиби бунга жавобан сувости дрони бир неча кун аввал ишдан чиққанини билдирди.
“У давом этаётган амалиётларни қўллаб-қувватлаш учун ҳудудий сувларда кузатув олиб бораётган эди. Носоз дрон эски модел бўлиб, унда махфий маълумотлар ёки сирли сонар ва радар ускуналари бўлмаган”, деди Пентагон вакили.
Андурил компанияси ҳам ўз аппаратларидан бири йўқолганини тасдиқлади, бироқ бу ҳолатга катта аҳамият бермади.
“Диве-ЛД автоном тизим бўлиб, у бошиданоқ йўқотилиш эҳтимоли юқори бўлган хавфли муҳитда ишлаш учун мўлжалланган”, деди компания вакили.
АҚШ ҳарбийлари денгизчилар ҳаётини хавф остига қўймасдан океанларни кузатиш ва душман гуруҳларини кузатиб бориш учун денгиз дронларига катта маблағ сарфламоқда.
Компания сайтида келтирилишича, Диве-ЛД базага қайтмасдан 10 кунгача ишлай олади. У 6000 метргача чуқурликка шўнғиш учун мўлжалланган. ДефенсеСсооп ҳарбий янгиликлар сайтига кўра, ҳар бир шундай Диве-ЛД қурилмаси тахминан 2,5 миллион доллар туради.
Эронга алоқадор тўртта нефт танкери Уммон кўрфазида, яна бири Харг ороли яқинида нишонга олинган.
Теҳрон бунга жавобан АҚШнинг Иорданиядаги базасига ракеталар учирди. Иорданиянинг ҳаво ҳужумидан мудофаа тизимлари Эроннинг 20 та ракетасидан 18 тасини уриб туширди.