Эрон Франсия дипломатларини мамлакатга киритишдан бош тортди
Эрон Франсия элчихонасининг икки дипломатига мамлакатга қайтишни тақиқлади. Бу ҳақда Реутерс 17-август куни хабар берди. Уларнинг июл ойида юзага келган дипломатик келишмовчиликка алоқадорлиги айтилмоқда.
Эрон Ташқи ишлар вазирлиги матбуот котиби Исмоил Бақоийнинг сўзларига кўра, ушбу дипломатлар Вена конвенсиясини бузган. Вена конвенсияси дипломатик миссияларнинг қоидалари ва имтиёзларини белгилайди. Бақоийнинг таъкидлашича, ходимлар Эрон фуқаролик жамиятини қўллаб-қувватлашга қаратилган фаолият билан шуғулланган.
"Ушбу шахслар фуқаролик жамиятини қўллаб-қувватлаш билан шуғулланганини таъкидлашнинг ўзи Вена конвенсияси бузилганини тан олишдир", деди Бақоий ҳафталик матбуот анжуманида.
У бу масалага батафсил тўхталмади. Теҳрон Ғарб давлатларининг ички ишларга аралашувига доимо салбий муносабатда бўлиб келган. Айниқса, феврал ойи охирида АҚШ ва Исроил Эронга ҳужум бошлаганидан бери вазият янада кескинлашган. Бу уруш ҳали ҳам давом этмоқда.
Франсия ташқи ишлар вазири Жан-Ноел Барро июл ойида Франсе Интер радиостансиясига берган интервюсида икки ходимнинг вазифаси Эрон фуқаролик жамияти, талабалар ва санъаткорларни қўллаб-қувватлаш дастурларини ривожлантириш бўлганини айтган эди.
"Франсия дунёда Эрон фуқаролик жамияти учун энг кўп иш қиладиган мамлакатлардан биридир. Биз бунинг эвазига бадал тўладик", деган эди вазир.
Франсия 21-июл куни Эроннинг муваққат ишлар вакилини чақиртирган. Бунга Эрон хавфсизлик кучларининг Теҳрондаги элчихона ходимларини ҳибсга олгани ва уларга нисбатан жисмоний тазьиқ ўтказгани сабаб бўлган.
Аввалроқ Руминия ҳаво ҳудудининг бузилиши сабаб Россия дипломатини ҳайдаб юборгани ҳақида хабар берилганди. Сабаби бу воқеадан олдин мамлакатга учта дрон кириб келган ва Бухарест бу воқеаларда Россияни айблаган.