Венесуела “камситувчи” баёнот сабаб Эрон элчисини чақиртирди
Венесуела Ташқи ишлар вазирлиги Эроннинг Венесуела ҳукуматига нисбатан айтган "камситувчи" баёноти сабабли ўзининг узоқ йиллик иттифоқчиси бўлган Эрон элчисини чақиртирди. Бу ҳақда Ал Арабия хабар берди.
Вазирлик баёнотида айтилишича, "Эрон Ислом Республикасининг Венесуеладаги элчиси мамлакатимиз институтлари ва ҳокимият органларига нисбатан айтилган камситувчи ҳамда ножўя фикрлар бўйича эътироз нотасини топшириш учун чақиртирилди".
Венесуела расмийлари қайси баёнот назарда тутилганига аниқлик киритмаган бўлса-да, ижтимоий тармоқларда тарқалган видеоларда Эрон ташқи ишлар вазири Аббос Ароқчининг "АҚШ билан музокаралар ҳақида гап кетганда Эрон Венесуела эмас" деган сўзларини кўриш мумкин.
**Кўп йиллик иттифоқчиликдаги дарз**
Каракас ва Теҳрон ўртасидаги бу совуқлик икки нефтга бой мамлакат муносабатларида бурилиш нуқтаси бўлиши мумкин. Томонлар 1999-йилда президент Уго Чавес ҳокимиятга келганидан бери яқин муносабатда бўлиб келаётган эди.
АҚШга қарши позицияда бўлган Чавес Эрон билан умумий душман сабаб яқинлашган. Мафкуравий яқинликдан ташқари, сўнгги 30 йил ичида икки давлат энергетика, кончилик, тиббиёт ва таълим соҳаларида йирик келишувлар тузган.
Мисол учун, 2020-йилда Венесуелада оғир иқтисодий инқироз юз берганда, Эрон уларга 1,5 миллион баррел бензин юборган. 2025-йилда АҚШ санксиялари сабаб дори сотиб олишда қийинчиликка учраган Венесуелага Эрон 2 миллиондан ортиқ полиомиелит ва гепатитга қарши ваксиналар етказиб берган.
**Сиёсий вазият ўзгармоқда**
Бироқ энди вазият ўзгарди. Январ ойидаги АҚШ ҳарбий рейди оқибатида сўлчи президент Николас Мадуро ҳокимиятдан ағдарилди. Шундан сўнг шаклланган Венесуела муваққат ҳукумати Эрон билан муносабатларни ўзгартириши кутилмоқда.
Шу орқали улар Вашингтон билан алоқаларни яхшиламоқчи. Маълумот ўрнида, АҚШ назорати остида Венесуеланинг янги ҳукуматини тузиш бўйича музокаралар 1-август куни бошланиши режалаштирилган. Аввалроқ Бразилия президентга ҳақорат сабаб Аргентинадаги элчисини чақириб олгани ҳақида хабар берилганди.