Эрон АҚШнинг Иорданиядаги базасига ҳужум қилишда Хитой сунъий йўлдош тасвирларидан фойдаланган
Эрон АҚШнинг Иорданиядаги базасига зарба беришда Хитой сунъий йўлдош тасвирларидан фойдаланган
Эрон июл ойида Иорданиядаги Америка ҳарбий базасига ҳужум қилиш чоғида Хитой ташкилотлари тақдим этган юқори аниқликдаги сунъий йўлдош суратларидан фойдаланган. Ушбу ҳужумда уч нафар америкалик ҳарбий ҳалок бўлган.
АҚШ расмийларининг билдиришича, Теҳрон 17-июлдаги зарбада оғир зарар кўрган Муваффақ Салти авиабазасининг юқори аниқликдаги сунъий йўлдош тасвирларини қўлга киритган. Расмийлар Хитой ташкилотларининг номларини ошкор этмади ва Хитой ҳукумати бу ҳужумга бевосита алоқадор деган фикрни ҳам илгари сурмади.
Мазкур хабар АҚШ президенти Доналд Трамп ва Хитой раиси Си Сзинпин ўртасида 24-сентябрга белгиланган учрашув арафасида Вашингтон билан Пекин ўртасидаги таранглик кучайган паллада пайдо бўлди.
Америка расмийлари бир неча ойдан бери Хитой компаниялари Эроннинг Америка кучларига қарши ишлатиши мумкин бўлган сунъий йўлдош суратларини сотаётгани ҳақида огоҳлантириб келган эди.
Июл ойида Эроннинг баллистик ракеталари Иорданиянинг шимоли-шарқидаги Муваффақ Салти авиабазасининг турар жой ҳудудига келиб тушиб, уч нафар АҚШ аскарини ўлдирган ва тўрт нафарини яралаган. Расмийларнинг айтишича, Эрон базадаги учувчили ва учувчисиз самолётларни ҳам нишонга олган.
Бу ҳужум апрел ойидаги оташкесимдан бери АҚШ ҳарбийлари илк бор ҳалок бўлган воқеа бўлди. Шундан сўнг Вашингтонда Эроннинг Америка ҳарбий обьектларини топиш ва уларга зарба бериш имконияти ортиб бораётгани борасида хавотир кучайди.
Ҳужумдан кейинги уч кун ичида Эрон базанинг айрим қисмларига етказилган зарарни кўрсатувчи юқори аниқликдаги суратларни эълон қилди. Оммага очиқ паст аниқликдаги сунъий йўлдош тасвирларига кўра, 20 дан ортиқ иншоот шикастланган.
АҚШ расмийларининг айтишича, бу уруш даврида Хитойнинг Эронни қўллаб-қувватлаши Америка кучлари учун ҳалокатли оқибатларга олиб келганини кўрсатувчи энг ишончли далилдир.
Хитой расмийлари бу айбловларни рад этиб, далиллар тақдим этишни талаб қилди. Таъкидланишича, Хитойнинг Вашингтондаги элчихонаси матбуот котиби Лю Чан танқидчиларни низодан фойдаланиб бошқа давлатларга атайлаб туҳмат қилишда айблаган. У Хитойнинг Эрон билан ҳамкорлиги халқаро ҳуқуққа мос келишини ҳам қўшимча қилган.
АҚШ расмийларининг таъкидлашича, Эрон Россиядан олинадиган разведка маълумотлари ва тасвирларга, шунингдек, ўзининг сунъий йўлдошлари ҳамда манбаларига таянади. Эрон сўнгги бор 9-сентябрга ўтар кечаси Американинг Иорданиядаги ҳарбий базасига ҳужум қилган эди. Бироқ Иорданиянинг ҳаво ҳужумидан мудофаа тизимлари Теҳроннинг 20 та ракетасидан 18 тасини уриб туширган.