Эрдўғанни ҳақорат қилганликда айбланиб ҳукм қилинган стендап қизиқчиси озодликка чиқиш арафасида
Туркиялик комедиячи Дениз Гўкташ қарийб 19 ойлик қамоқ жазосига ҳукм қилинди, бироқ жазо муддатини ўтаб бўлгани сабабли озод этилиши кутилмоқда.
Эрдўғанни ҳақорат қилганликда айбланиб ҳукм қилинган стендап комик озодликка чиқиши кутилмоқда
Душанба куни Истанбул суди биноси олдида тўпланган қизиқчининг тарафдорлари қўлларида «Дениз Гўкташ ёлғиз эмас» деб ёзилган плакатларни ушлаб туришди.
Истанбул суди таниқли қизиқчини Президент Режеп Таййип Эрдўғанни ҳақорат қилганликда айбдор деб топди ва уни қарийб 19 ойлик қамоқ жазосига ҳукм қилди, бироқ жазо муддатининг бир қисмини ўтаб бўлгани сабабли уни озод қилиш ҳақида буйруқ берди.
Шунингдек, унга нисбатан Туркияни тарк этишни тақиқловчи саёҳат тақиқи жорий этилди.
Эндиликда иш якуний қарор қабул қилиниши учун апелляция судига юборилади.
Айбловларни рад этган Дениз Гўкташ аллақачон панжара ортида қарийб 90 кун ўтказди. Прокурорлар унга 12 йилгача қамоқ жазоси беришни сўрашган эди. Унинг иши Туркиядаги ҳибсга олишлар тўлқини фонида юз бермоқда, инсон ҳуқуқлари ташкилотлари буни мухолиф фикрларни бостиришга қаратилган деб ҳисоблайди.
Унинг стендап чиқиши YouTube'да кенг тарқалиб, 15 миллиондан ортиқ кўрилган.
Прокурорлар қизиқчининг Туркия раҳбарини «уятчан диктатор» деб таърифлаган бир жумласига эътибор қаратишди, бироқ Гўкташ айтган гапларида «ҳеч қандай жиноий унсур» йўқлигини таъкидлади.
«Диктатор — ҳақорат эмас», деди у. «Бу сиёсий таърифдир».
Аммо Туркияда президентнинг кўнглига тегиш ҳазил қилинадиган нарса эмас. Гўкташ июль ойида таътилдан қайтганида Истанбул аэропортида ҳибсга олиниб, қўлига кишан солинган эди.
Душанба кунги суд мажлисида унинг бир кишилик камерада ўтказган 88 кун давомида ҳазил туйғусини йўқотмагани яққол кўриниб турди.
«Ҳаётимдан уч ой тортиб олинди», деди у минбардан туриб. «Аммо мен чекишни ташладим, шунинг учун ҳаётимга яна уч ой қўшаман». Бу гап суд залида кулги ва баланд қарсакларга сабаб бўлди.
Ташқарида эса унинг ҳамкасби Фират Аксал каби тарафдорлари ҳукмдан ёқимли ҳайратда қолишди.
«Қувончимиздан нима қилишни ҳам билмаяпмиз», деди у. «Биз жуда хурсандмиз. Тўғрисини айтсам, адолатли суд бўлишидан умидимиз йўқ эди».
Унинг айтишича, Гўкташ энди бир неча кун дам олади, оиласини кўради ва кейин саҳнага қайтади.
Қизиқчи яқин соатларда озод қилиниши кутилмоқда, бироқ кўплаб бошқа шахслар, жумладан журналистлар, ҳуқуқ ҳимоячилари, намойишчи талабалар, ЛГБТҚ фаоллари ва Истанбулнинг сайланган мэри Экрем Имамоглу ҳамон қамоқда қолмоқда. Бу кунларда Туркияда қамоқхоналар тўлиб-тошган.