«Энг кучлилар иккитамиз – мен ва Мбаппе. Бу йил – мен». Ямал «Олтин тўп» ўзига берилиши кераклигини айтди
Килиан ҳам камтарлик қилиб ўтирмаяпти.
«Энг кучлилар иккитамиз – мен ва Мбаппе. Бу йил – мен». Ямал «Олтин тўп» ўзига берилиши кераклигини айтди
Ламин Ямал бу гал «Олтин тўп» айнан унга топширилиши кераклигини айтмоқда — у «Барселона» ва Испания миллий жамоаси билан эришган натижалари асосида бунга муносибман, деб ҳисоблайди.
Килиан Мбаппе ҳам медиапойгада ортда қолмаяпти ва у ҳам шов-шувли баёнотлар бермоқда.
«Мен уни дунёнинг энг яхшисига берган бўлардим. Мен бунга муносибман».
19 ёшли вингер собиқ футболчи Ҳорҳе Валдано билан «Валдано олами» дастури учун суҳбатлашди.
– Сен «Олтин тўп»ни кимга берган бўлардинг?
– Бу узоқ муҳокама қилинадиган мавзу. Мен [мукофотни] дунёнинг энг яхши футболчисига берган бўлардим. Мен шундай ҳисоблайман: дунёнинг икки энг яхши футболчиси – Мбаппе ва мен. Қўлга киритган ютуқларимдан келиб чиқсак, мукофотга бу йил мен кўпроқ лойиқман.
– Шунчалик аниқми?
– Мен учун – ҳа, аниқ. Ўйлайманки, бу футбол томоша қиладиган ҳар қандай инсон учун тушунарли.
«Олтин тўп» борасидаги фикридан сўнг испаниялик футболчи ғолибликка эришилган жаҳон чемпионати ҳамда ўзининг футбол тарихидаги ўрни ҳақида ҳам мулоҳаза билдирган: «Ўзимнинг ўйиним нуқтайи назаридан, ҳатто ғалабадан кейин ҳам жаҳон чемпионатидан қониқиш ҳосил қилмадим. Жароҳат билан боғлиқ воқеанинг бунга алоқаси йўқ, чунки биламан: агар ЖЧ яна такроран ўтказилса, мен ўша даражада ўйнаган бўлардим ва яна ўзимдан қониқиш ҳосил қилмасдим.
Мен одамлар пайқамайдиган кўп ишларни қилдим – масалан, ўзим билан бирданига уч нафар рақибни олиб юрдим ва бундай футболчи ҳар қандай мураббий учун ҳақиқий топилма. Лекин барибир ўзимдан кўнглим тўлмайди. Бошқа кимдир бундай кўрсаткичлар билан ЖЧни ажойиб ўтказдим, деб ҳисоблаши мумкин. Аммо мен эмас. Мен бундан ҳам кўпроғини қила олардим. Шундай қилиб... жамоага ёрдам бердим, лекин аллақачон кейинги турнирни кутяпман.
Бунгача буюк юлдузлар бўлган: Лео, Криштиану, Диего кабилар – гарчи мен охиргисига тўқнаш келмаган бўлсам ҳам. Аммо ҳеч ким бу ёшда бунчалик кўп соврин ютмаган. Пеле-ми? Ҳа, ҳақиқатан ҳам, лекин бунга анча бўлди. Одамлар шунча соврин ютгач, қайсидир паллада бўшашиши мумкин. Лекин мен биламанки, футбол тарихига абадий кириш учун ҳали минглаб ишларни амалга оширишим керак».