“Олтин тўп”га даъвогар футболчиларнинг янгиланган рейтинги эълон қилинди — ОАВ

**ОАВ: "Олтин тўп"га даъвогарлар рейтинги янгиланди**

Индепендент нашри 2026-йилги "Олтин тўп" соврини учун асосий беш номзодни эълон қилди.

Унга кўра, Испания терма жамоаси ва "Барселона" яримҳимоячиси Родри мукофотни қўлга киритиш учун энг асосий даъвогар ҳисобланади. Родри ўтган мавсумнинг катта қисмини ўтказиб юборганига қарамай, Испания терма жамоаси билан 2026-йилги Жаҳон чемпионатини ютиб, турнирнинг энг яхши футболчиси деб топилди.

Иккинчи ўринни Мюнхеннинг "Бавария" клуби ҳужумчиси Ҳарри Кейн эгаллади. У ўтган мавсумда барча мусобақаларда 61 та ўйинда майдонга тушиб, 73 та гол урди ва 8 та голли узатмага муаллифлик қилди. Натижада, Кейн Европанинг энг яхши тўпурари сифатида "Олтин буца"ни қўлга киритди.

Кучли учликдан "Барселона" ва Испания терма жамоасининг 19 ёшли иқтидорли футболчиси Ламин Ямал жой олди.

Тўртинчи поғонани Мадриднинг "Реал" клуби ҳамда Франсия терма жамоаси сардори Килиан Мбаппе эгаллаган бўлса, кучли бешликни "Интер Маями" ҳужумчиси ва Аргентина терма жамоаси сардори Лионел Месси якунлади.

Индепендент талқинига кўра, кучли бешлик қуйидагича:

* Родри ("Барселона");

* Ҳарри Кейн ("Бавария");

* Ламин Ямал ("Барселона");

* Килиан Мбаппе ("Реал Мадрид");

* Лионел Месси ("Интер Маями").

Маълумот учун, "Олтин тўп"нинг тарихий тақдирлаш маросими 26-октябр куни Лондонда бўлиб ўтади. УЕФА ва Франсе Фоотбалл мукофотнинг 70 йиллик тарихида илк бор гала-кечани Париждан ташқарида ўтказишга қарор қилди. Бу орқали 1956-йилда "Олтин тўп"нинг илк соҳибига айланган афсонавий англиялик сер Стенли Метюзга ҳурмат бажо келтирилади.

Саккиз карра "Олтин тўп" соҳиби Лионел Месси 39 ёшида ҳам ушбу соврин учун асосий даъвогарлардан бирига айланди. У Жаҳон чемпионатида 8 та гол уриб, Аргентина терма жамоасининг финалгача етиб боришига катта ҳисса қўшди ва қисқа муддатга мусобақа тарихидаги энг яхши тўпурар ҳам бўлди. Бироқ кейинчалик бу рекордни Килиан Мбаппе янгилади.

Мукофот фақат 2025/26-йилги футбол мавсуми якунлари асосида топширилади. Амалдаги "Олтин тўп" соҳиби эса "ПСЖ" вингери Усмон Дембеле ҳисобланади.